ICH Marichart von Tyrenstain vnd ich Agnes sein Hausvraw vnd alle vnser Erben Wir veriehen offenbar mit dem brief vnd tun chunt allen den die in ansehent oder ho^erent lesen Daz wir mit wol bedachtem mu^et vnd mit gunst vnd willen aller vnser Erben die zeit da wir ez mit recht wol tun machten redleich vnd recht verchauffet vnd ze chauffen geben haben vnsers lehens mit vnsers lehenherren hant dez Erwirdigen fu^ersten pyscholf Albrechtz pyscholf ze pazzaw vnser tail zehentz datz Guetenprunn auf dem hauspaw vnd auf dem dorff chlainen zehent vnd ze Newnhoffen von ainem achtail den zehent vnd was dar zu geho^ert chlainez zehentz vnd pey der Grazzen vnser tail zehentz ze Egendorf vnd ze Newnhoffen vnsern tail weinn zehentz mit alle die vnd ze den zehenten gehort wie so daz allez genant ist vnd wa iz allez gelegen ist besucht vnd vnbesucht vnd haben auch verchauffet vnsers aygens viertzehenthalben phenning geltz auf ainem lehen datz Reudnikch die man jaerleich dient an sand Michels tag. Daz vargenant gu^et allez hab wir allez verchauffet mit alle den nuczen vnd rechten vnd wir ez allez in nucz vnd gewer her pracht haben also hab wir ez allez ze chauffen geben vmb an ains dreischzk phunt wienner phennig der wir gantz vnd gar verriebt vnd gewert sein an allen schaden dem Erwirdigen Geistleichn herren hern Nyclon von den Paynn die zeit Probst ze Herczogenburch dez Gotzhaus dez guten herren sand Georigen vnd dem Conuent daselbs furbas ledichleich vnd vreyleich ze haben vnd allen irn frum da mit schaffen verchauffen versetzen vnd geben wem sew wellent an allen irsal wir sein auch dez vargenanten gutz allez vnd waz dar zu^e geho^ert ir recht scherm vnd gewer fur alle ansprach als lehens vnd aygens ir igleichs recht ist in dem Lande ze Osterreich waer aber daz in dar an icht ab gieng mit recht waz si dez schaden nement daz schulle wir in allez auzrichten vnd widercheren an allen irn schaden vnd schullen sew daz haben auf vns vnd auf alle dem gu^et daz wir haben in dem Lande ze Osterreich. wir sein lewentig oder Tod. Daz der Chauff vnd die wandlung alle also stet vnczebrochen beleib dar vber gib ich vargenanter Marichart von Tyerenstain in den brief versigilt mit meinem aygen anhangvnden insigil Dez sind zeug die Erbern herren her Rudolf vom Losenstain vnd her fridreich der Marchal (sic) von Pappenhaym mit irn anhangvnden insigiln in an schaden. Gebn an sand Luceintag nach Christ gepurde drewczehen hundert iar dar nach in dem seches vnd sechzkistem Iar.

Source Fulltext: FAIGL, Herzogenburg (Wien 1886) S. 249-250