ICH Nyclas der Wyldungsmawr vnd mein Hauswrow vnd all mein eribn, vnd ich Goeschel der Wyldungsmaurer sein veter vnd all mein eribn vergehen offenleich mit dem prieff daz wier ein Myshelung gehabt habn gegen den erbern geistleichen Chorherren von Herczogenburch vmb drey lay vrey aygenhaftew gu^eter dritthalb phvnt geltz de do gelegen sindc zehen schilling geltez gelegn dacz hawczenueld auf einem lechen do dew czeit auf gesezzen ist Pravnwart, vnd ain lechen gelegen dacz Oberndorf vnd dient auch ain phvnt phennig do auf gesezzen ist dew czeit Lewpolt der Stettner, vnd auf ainem behausten holden in dem Marcht dacz Herczogenburch Sechczich phennig do dew czeit auf gesezzen ist Nycla der Smyd, der Myshelung der ee gnanten gu^eter cze payden Seyttn sey wir ga^enczleich gegangen hinder den erwirding herren hern Weychartn von Toppell de czeit gesezzn in dem haus im pach der hat dor vber noch vnser aller fuer gab ze paydn seittn gesprochen, daz de ee genanten gu^eter mit alln den rechten vnd nuczen als sew von alter her chomen sind also sulln sew gentzleich vnd gar von vns vnd von alln vnsern erbn hinfuer ewichleich ledig vnd frey sein, vnd sulln fu^erbaz dienn vnd wartund sein den erbern Geistleichen Chorherren dez Goczhauzz dacz Herczogenburch vnd sulln auch hincz den obgenantn gu^etern chain recht noch anspruch nicht haben weder vmb vil noch vmb wenich. Ich e genanter Nycla der Wildunsmawr (sic) vnd mein veter Go^eschel der Wyldungsmaurer sein der ee genanten gu^eter recht scherm vnd gewer fu^er all anspru^ech noch dez landes recht in Osterreich. gyeng in aber dor an mit recht icht ab, daz sulln se habn dacz vns vnuerschaydnleichn vnd auf allerr vnserr hab de wir habn vnd lazzn in dem Land cze Osterreich wir sein lembtig oder tad. Daz hin fuer dew handlung stett beleib geb wir ich e genanter Nycla der Wyldungsmavrer den obgenanten Chorherren dacz herczogenburch den prieff besygelten mit meinem aygen anhangunden Insygel, wan ich Go^eschel der Wyldungsmavrer nicht aygn insigel hab so verpind ich mich mit mein trevn hinder meins veter Insigel her Nyclas von Wyldvngsmavr alz daz stett ze habn waz vor an dem prieff geschribn ist. Dez sind czewg di erbirdigen herrn her Weychart von Topell gesezzen in dem haus impach der den spruch also gesprochen hat mit seim anhangundem Insigel vnd her Ott der Wildungsmawrer der auch dew obgenante handlung weczevget vnd westett mit seim anhangunden Insigel. Gebn nach christi gepu^erd v^eber drevczehenhvndert iar dar nach in dem drew vnd Subenkisten jar dez freytags noch sand Bartholomey tag.

Source Fulltext: FAIGL, Herzogenburg (Wien 1886) S. 273-274