ICH Mert der Seltensro vnd Ich Chuenigund sein Hawsvrow. vnd all vnser erbn vergehen offenleich mit dem prief daz wir recht vnd redleich gelten schulln den erbern Geystleichen Chorhern dacz Herczogenbuerch von dez hoffz wegn gelegn dacz Werdarn den wier von in gechauft habn zwelif phunt gemayner Wyenner phennig der ich vnd mein erbn sew richten vnd weren schol vnuerczogenleich von sand Merten tag der nu^e schirist chumbt. dor noch v^eber drew Iar an all wider red. vnd czv einer guetn gewizhait hab ich mit sant mir cze pu^erigel vnd cze gewer gesaczt Iansen den Weyzzen von Wyphing vnd Jo^erign den Prwnnmayster von Wolfpayzzing also daz de ee gnanten Chorherrn de vorgnanten zwelif phunt phennig habn schulln dacz vnsern trewen vnd auf aller vnser hab de wier habn vnd gewinnen in dem Land ze Osterreich vnverschaiden von ainem hintz dem andern. Ich verpint mich vnd all mein nachchomen hin fu^er ewichleich do van ja^erleich zdinen zwelif schilling gemainer wyenner phennig cze czwain tagn. vnd hef erst mit dienst an auf den nochsten sand Jo^erign tag mit Sechz schilling cze dienen vnd dornoch auf sand Mychelz tag Sechz schilling cze dinen hinfu^er ewichleich also do pey beleibn. Ich ee gnant Mert der Seltensro vnd all mein noch chomen verpinten vns trewlich auf dem ee gnanten hoff gehorsam sein den vorgnanten Chorherrn mit stewr mit dienst vnd alz daz ze leyden waz ander ir gemayn holden leident an all wider red. Daz hin fu^er daz stet beleib gib Ich ee gnanter Mert vnd mein ee gnant pu^ergel den vorgnanten Chorherrn den prief besygeltn vnd bestetten. wann Ich ee gnanter Mert nicht aygen Insygel hab so han ich vnd mein ee gnanten purgel gepeten die erbern hern Merten den Eyzdorfer vnd hern Stephan den Judenawer, daz si der obschribn sach trewn gedenchencher (sic) sein mit ier paydn anhangunden Insygel. Gebn noch crist gepurd vber drewhundert (sic) Iar dor noch in dem drew vnd Sw^ebenczkistn Iar dez Samiztag nach dem heyligen auffertag.

Source Fulltext: FAIGL, Herzogenburg (Wien 1886) S. 269-270