Wir Niclas von Gotes gnaden Probst sand Jorigen Goczhaus ze Herczogenburg vnd de gemain aller vnsers Conuentz da selbs Wier vergehen o^effenleich mit dem prieff allen Law^eten de nu^e lewent oder hernach chu^enftig sind. dacz vns vnd vnserm Goczhaus der erber beschaiden man Artolf der Chramer von herczogenwurg durch got vnd merung seines Lobs vnd aller seiner Heiligen ze hilf vnd auch ze trost seiner vnd aller seiner vodern Sel hayll willen gegeben vnd auch verricht hat czway hundert phunt phennig gemayner wyenner mu^enizz der wir ga^enczleich verricht vnd gewert sein ze rechten ta^egen Also weschaidenleich daz wir vnd all vnser nochchomen vnsers Conuentz nu vnd hinfu^er ewichleich mit vnser gu^eten gewizzen vns verpinden vnd auch verpunden haben ayner ewign Mess ta^egleich ze sprechn auf sand Nyclas alter gelegn in dem Capitel in vnserm Chloster ze herczogenwurg an alle sawmung vnd vnderlazz. Also daz de selb vorgenant Mess ta^egleich gesprochen schol werdn noch der wandlung sand anne Mess in dem selben Capitel an alle ierrung vnd zu einer ewigen bestetigung hab wir ee gnanter Probst Nycla vnd vnser Conuent dem vorgenanten artolfen dem Chramer auz geczaigt vnsers rechten freyn aygnhaften erchauften versporten gu^etz czehen phunt geltz gelegen in vnser pharr herczogenwurg ze oberndorf zwischen Raetelperig vnd fyehoffen auf ainem hoff vnd vierdhalben Lehen vnd Newn hofsteten auf vberlend vnd wayd wie daz alz genant ist daz zu den ee genant gu^etern geho^ert vnd von alter her ist chomen iz sey gestift oder vngestift versuecht oder vnuersuecht also hab wir sew ledigchleich gegeben vnd gemacht auf sand Nyclas alter zu der ee gnant mess mit gunst vnd willn dez erwierdigen herren hern Stephans von Topell der der ee gnant gu^eter rechter eribvogt ist, also mit ausgenomen worten daz man igleichen herrn ta^egleich wer de Mess spricht Sechz phennig Raychen vnd geben schol an alle irrung. Wer aber daz dez got nicht engeb daz der eegenant conwent vnd wir Chorherren an der vorgenanten Mess vnd goczdinst sawmig weren vnd nicht begyengen als vor geschribn ist iz wer gar oder ein tayl wann vns dann noch der ee genant sawmichait mont vnd vodern die erwierdigen Geystleichen Chorherren von sand andre so schull wir dann volpringen vnd volfu^eren allez daz versawmpt ist an alle vnser wider red. Wer aber daz wir die ee genant sawmichait nicht ervolten vnd wider prechtn dor nach in zwain Ma^enneyden so schulln dann die eegenanten czehen phunt geltz mit vnserm gu^etleichen willen hinfu^er ewichleich geuallen den erwirdigen geystleichen Chorherren von sand andre alln irn frum domit schaffen mit versetzen mit verchauffen gebn wem se wellen an alle vnser irrung. Daz daz hin fu^er ewichleich also stett beleib geb wir eegenanter Probst Nicla vnd vnser Conuent dem vorgenant artolfen dem Chramer von herczogwurg den prieff versigiltn vnd wolbestettn mit vnserm vnd vnsers Conuentz payden grozzen anhangunden Insigeln zu einem offenwaren vrchund. der ee geschribn sach ist auch czeug der erwirdig herr her Stephan von Toppell der der obgenanten gueter rechter eribvogt ist mit seinem anhangunden Insigel im vnd sein erben an schaden an der vogtey alz der prief sagt den wir im dor vber gegebn habn. Gebn noch Christi gepurd v^eber drewczehen hundert jar dornach in dem drew vnd Sybenczkisten jar dez Suntags vor sand Peters tag vnd vor sand pauls der heyligen czweliff poten.

Source Fulltext: FAIGL, Herzogenburg (Wien 1886) S. 271-273