ICH Peter der Chnavsl Fleischhakcher ze Mavttam vnd ich Katrein sein hausfravn dez schyemer tochter vnd Mert der Huetstokch vnd anna mein hausfrow vlreichs tochter von gater, vnd ich Mert am puhel dacz pach vnd Elzpett mein havsvrow Levmans tochter von pach vnd ich Sthephan der Cznaimer vnd Elzpett mein hausvrow vlreichs tochter von vdmerveld vnd ich Wolfel gortner vnd Elzpett mein hausvrow weigleins tochter von Rossassn wir vergechen all gemain offenleich vnd tuen chvnt mit dem prief allen di in sehent oder horent lesen di nu lebent oder her nach chu^eftig sind daz vns allen di Erbirdigen geistleichen herren Probst hans ze Herczogenburch vnd der Conuent da selbs lazzen haben vnuerchauft irr aigenhaften gru^ent ie dem man mit seiner hausfrawn di vor genant sint zu ir paider leib, igleichem tail ain jeuch weinbast, di gelegen sein pei irem hof ze hunczhaim. Also weschaidenlich. daz wir obgenant all di egenanten weingarten ie der tail sein jeuch. pavn. lesen, vnd pressen schol. an all ir mue vnd hilf, vnd daz selbig schulln wir all pringen ze ir press in iren hof ze hunczhaim, wir schulln in auch all, ie der man von seinem tail den dritten emmer most geben in dem Lesen pei der press. im wert vil oder wennich, den si vessen schulln in ir vas. Schull wir auch di obgenanten weingarten nicht lesen noch den Most pei der press nicht tailen. iz sei den ir anbalt vnd pott da pei. Wir schulin auch den pressern vnd andern aribaittern chost. liecht, vnd lan geben, an die trager. den si lonen schulln von irem tail zetragen in ir vas. Schulln auch wier czehenten von vnserm tail vnd sev von dem iren, sev schulin vns auch inn die press allen gericht schaffen vnd gebn an all vnser mue was rechtleich dor zu gehort. Wir habn auch vreie wal ie der tail sein frum do mit ze schaffen mit verseczen mit verchauffen mit allen den rechten vnd wir dor an haben vnd auch geleichen la^euten. di in dor zu fuegleich sein, vnd schol daz geschehen mit irem willn vnd mit ier hant. Wier schuln auch di obgenanten weinga^erten all ie der man sein tail in mitterm gu^ettem pav habn mit stekchen, mit gruben vnd mit anderm paw daz dor zu gehort. Teten wier dez nicht, daz si daz mit den nachtgepavren vnd vmseczen beczeugen. so schulln sev vns mit vnserm guetleichem willen mit vnserm tail in dem Lesen pei der press phenden. vnd schulln wir von allen vnsern rechten geuallen sein, iz wer ainer. czwen. oder drein minrr oder mer recht als ob wir wern tod, vnd wan daz ist. daz der lest vnder igleichem tail als sev vor geschribn stent abgieng mit dem tod, vnd daz erst pav in dem weingarten volpracht hiet. der mag di nucz dez selbn jars in dem Lesen geschaffen wem er wil Also daz dem weingarten an dem andern pav vnzt hincz dem Lesen nichcz verczogen berd, vnd schol fuerbas daz selbig jeuch weingarten in vnd irem goczhaus ledig vnd frei sein an allen chrieg vnd wider red. Vnd daz di red vnd de wandlung also fu^erbas steet vnd vnczebrochen weleib der vber geb wir obgenant all ich Peter der Chnausl, vnd ich Mert der Huetstock vnd ich Mert am puhel vnd ich Stephan der Cznaimer vnd ich wolfel der g ortner und vnser obgenant hausfravn mit sampt vns den ee genanten wirdigen Geistleichen Herren hern Hansen Probst ze Herczogenburch vnd dem Conuent gemain da selbigs den prief, wen wir selb nicht aigner insigel haben. versigelt mit dez erbern verschalichs di czeit richter ze Mavttorn insigel. vnd dez ist auch geczeug andre von ralarn di czeit purger ze Mavttorn mit seinem insigel. di wier dez fleizzichleich gepetn habn. daz sev der sach zeug sint in an schaden. Der prief ist geben nach christes gepuerd drevczehen hundert jar vnd do nach in dem sechs vnd Sybenczkisten iar an vnser Wravn tag zu der Liechtmess.

Source Fulltext: FAIGL, Herzogenburg (Wien 1886) S. 279-280