Wir Leupolt von Gots gnaden Herczog ze O^esterreich ze Steyr ze Kernden vnd ze Kram Graf ze Tyrol etc. Bekennen vnd tun kunt offenleich mit disem brief. Wan wir vnderweiset sein daz di erbern gaistlichn vnser liebn andechtigen. . . . der Probst vnd daz Gotzhaus ze Hertczogenburg in grozzer geltschuld vnd chumber sind. Darumb zu besunderer gunst hilffe vnd furdrung haben wir in die gnad getan vnd tun ovch wizzentleich mit disem brief was si in vnserr Stat ze Tulln oder vmb die Stat Gruntrecht vnd Purkrecht habent daz man das nicht ablosen sulle vnd muge, in dhainen wegen, vnd sol in daran kain schade sein die geseczde, die weilnt vnser lieber bru^eder herczog Ruedolf selig vmb ablosung des Gruntrechts vnd purkrechts getan hat wan wir ernstlich mainen, daz das egenant Gruntrecht vnd Purkhrecht vnd Gulte bei dem Goczhaus beleiben. Mit Vrckunt dicz briefs. Geben ze Wienn an phincztag vor Svnwenden. Nach Krists Geburde dreuczehenhundert Jar darnach in dem Siben vnd Sibenczigistem Jare.

Source Fulltext: FAIGL, Herzogenburg (Wien 1886) S. 281-282