Beatrix de Nurnberg dei gracia ducissa Austrie Styrie Karinthie atque Karniole, Comitissa Tyrolensis etc. Reuerendo in Christo patri, domino . . . preposito in herczogenburg atque Conuentui ibidem Salutem in domino sempiternam. Deus omnipotens cuncta pro sue libito voluntatis disponens voluit ut hii qui principum defensioni et regimini subsunt in terris eorundem prole seu fetu principum nato vel nata gaudendi sumant materiam et leticie recipiant incrementum pro cuius intersigno in antiquis hystoriis Regum et principum dies natales annis singulis cum gaudio fuisse celebrati leguntur. Sane quod nos diuina fauente clemencia Illustris principis domini nostri Alberti ducis dictarum terrarum Conthoralis in vigilia sancti Mathei apostoli et ewangeliste hoc est die XVIIII Mensis Septembris hora quasi Nona prolem masculinam peperimus disposicionis perfecte forme speciose ac elegantis, magnitudinis et procere, de cuius partu quanto eum toti terre utiliorem credimus tanto de ipso maius et iocundius gaudium deo auctore vos non ambigimus percepturos, Nos iuxta consuetudinem approbatam et laudabilem priorum nostrarum ducissarum in ortu primogenitorum suorum obseruatam hactenus, deuocioni vestre super prouisione fidelis nostri Vlrici natum nobilis viri Weykchardi de Toppel filicis recordacionis dei et huiusmodi nostrarum precum intuitu in vestros Ordinem et Monasterium recipere nec non sibi de prebenda Conuentuali vestri Monasterii prouidere, ac eandem sibi assignare velitis adeo prompte et liberaliter, quo abinde nobis debite fidelitatis affectus, quem ad nos gerere credimini clarius patefiat, Nosque vestris comodis et utilitatibus fauorabiliter de cetero intendamus. Harum testimonio literarum nostri sigilli appensione signatarum. Datum Wienne feria tercia proxima post diem Sancti Mathei apostoli et ewangeliste. Anno domini Millesimo Trecentesimo Septuagesimo septimo.

Source Fulltext: FAIGL, Herzogenburg (Wien 1886) S. 284-285