Wir Johanns von Gots gnaden Probst des Gotzhaus ze Hertzogenburkch vnd wir der gantz Conuent gemain daselbs Vergehen fu^er vns vnd fu^er all vnser nachchomen vnd tun chunt offenlich alle den die den brief sehent oder ho^erent lesen die nu lebent vnd hernach chu^enftich sind, Daz wir mit gemainem veraintem Rat ze der zeit do wir es wol getun machten. vnd mit vnsers perchherren hant des erbern herren hern Hainreichs Techent vnd pharrer ze Tulln vnd ze den zeiten Amptman des pistums ze Pazzaw in O^esterreich Recht vnd Redleich verchaufft habn vnsern weingarten gelegen ze Chunigsteten an der Holczstrazz. des ein halbs jeuch ist vnd haist der Jorger ze nast Michels weingarten des Seber. vnd davon man alle jar dient dem Pistum ze Pazzaw einen halben emmer weins perchmazz ze perchrecht vnd nicht mer. Denselben weingarten habn wir verchaufft vnd gebn mit alle den nu^eczen vnd rechten dem beschaiden mann Gerungen in Tulbinger gazzen ze Chunigsteten. frowen Angnesen seiner hausurowen vnd ir baider erben vmb zwaintzg wienner phennig ewigs gelts di si vnd all ir nachchomen di denselben irn weingarten nach in innhabnt. vns vnd vnserm Gotzhaws fu^erbas ewichleich da von dienen vnd raihen sulln mit einander alle iar an sand Merteinstag vnd sulln auch mit dem ersten dinst anheben ze dienen von sand Merteins Tag der schirist chumt vber ein gancz iar. vnd wenn der dienst versezzen wirt so sind fu^erbas dar auf alln die recht, als vm versezzen dienst recht ist nach des Lanndes recht in Osterreich. Si sulln vnd mugen auch den egenanten weingarten fu^erbas ledichleich vnd freileich haben vnd alle irn frumen damit schaffen verchauffen versetzen vnd geben wem si welln an alln chrieg vnd irrsal. Wir sein auch vnuerschaidenleich fu^er vns vnd fu^er all vnser nachchomen des egenanten weingarten ir recht gewern vnd scherm fur all ansprach als perchrechts recht ist vnd des Lanndes recht in Osterreich. vnd was in mit recht dar an abget daz sulln si habn auf alle dem gu^et daz zu dem egenanten vnserm Gotzhaws geho^ert wo daz in dem Land ze O^esterreich gelegen ist. vnd wen daz wer daz si den weingarten verchauffen wolden so sulln si vns vnd vnserm Gotzhaus den von erst vor aller menichleich anpieten vnd sulln den dann chauffen nach vir mann Rat hab wir noch mug wir sein dann nicht chauffen so sulln si den vorgenanten weingarten nur geleichen pawleuten als sew selb sind gebn vnd verchauffen. Vnd daz der Chauf fu^erbas also stet vnd vnczebrochen weleib daruber so gebn wir in den brief ze einem offen vrchund der sach versigelt wir vorgenanter Johans Probst des Gotzhaus ze Hertzogenburch mit vnserm Insigel. vnd mit vnsers des Conuents Insigel daselbs vnd mit des egenanten erbern herren Insigel hern Hainreichs Techent vnd pharrer ze Tulln vnd zu den zeiten Amptman des Pistums ze Pazzaw in Osterreich. Der prief ist gebn nach Christi gepurd Drewtzehenhundert jar darnach in dem Siben vnd Sibenczgistem jar des nasten Sunntags vor sand Gilgen Tage.

Source Fulltext: FAIGL, Herzogenburg (Wien 1886) S. 282-283