In Nomine domini Amen. Per hoc presens publicum Instrumentum vniuersis pateat euidenter. Quod anno a natiuitate eiusdem domini Millesimo Trecentesimo Septuagesimo octauo, Indictione quarta, Pontificatus sanctissimi in Christo patris et domini nostri domini Gregorii diuina prouidencia pape undecimi Anno Octauo die penultima Mensis februarii hora quasi tercia. In Monasterio sancti Georii Hertzogenburge patauiensis diocesis et in choro ante summum Altare ibidem in mei Notarii publici et testium presencia subscriptorum Constituti personaliter honorabiles et Religiosi Viri domini Stephanus decanus canonici et capitulum ecclesie Hertzogenburgensis domino Johanne de Leubsa nouissimo eorum preposito de medio sublato Conferentes in simul et tractantes de uno prouido ac viro circumspecto inter se in futurum prepositum eligendo et ipsis ac dicto eorum Monasterio in huiusmodi viduitatis errore succurrendo, tandem concorditer et vnivoce in forma scrutinii consenserunt tali condicione adiecta, quod quicunque ex ipsis canonicis in Prepositum preficeretur et Pastorem, teneretur ad obligaciones articulorum et statutorum conueniencium, et hoc sub stola corporalibus iuramentis dextris eorum manibus tactis sacrosanctis dei evangeliis confirmarunt. Primo quod prepositus futurus quem dicti canonici ac maior et sanior pars eorundem per dictam formam scrutinii ducerent eligendum ipsis canonicis et conuentui Annis singulis de perceptis et distributis omnium prouentuum ipsius Monasterii plenam et completam faceret racionem. Idem dominus Prepositus a die confirmacionis sue et ammodo per sua tempora nullum sibi ius et potestatem in bonis ad oblagium dicti Monasterii pertinentibus tentet vindicare abstrahendo obligando seu possessiones bonorum eorundem aliquatenus aggrauando. Obseruabit eciam antiqua iura Brandiorum videlicet Natiuitatis Christi vigiliam cum toto festo, quatuor brandia in Carnispriuio, Pasce vigiliam cum festo. In festis beatorum Augustini et Martini consolaciones eciam cum festiualibus et minucionalibus ipsis amministret. Procuracionem Regalem prime Misse cottidie persoluet. Vestimenta annuatim videlicet Estiualia ac hyemalia more consueto porrigat ac eciam amministret, nisi in quantum dicti domini Canonici beniuole condescendant. Nullum eciam Canonicorum absque consilio et assensu dominorum Decani et duorum seniorum emittat alienet seu permutet. Deinde omnia Jura ordinis et Refectorii ab antiquo obseruata conseruet et absque diminucione aliquali amministret. Personam quamcunque ipsorum in collegium ipsis irrequisitis colligere et recipere non tenetur. Vinum dominis Canonicis pro Prebenda distribuendum ad speciale Celare collocetur. De quibus omnibus et singulis dicti domini Canonici ipsis per me Notarium infrascriptum unum et plura publica fieri pecierunt instrumenta. Acta sunt hec Anno Indictione Pontificatu die Mense hora et loco quibus supra presentibus discretis viris dominis Georio dicto Daum et Georio plebano in Hausleitten presbyteris dicte patauiensis diocesis friderico dicto Amman Laico pro Testibus ad premissa vocatis pariter et rogatis. Signum Notarii. Et ego Reichkerus dictus Monacher Clericus Ratisponensis diocesis publicus auctoritate Imperiali Notarius premissis omnibus et singulis dum ut prefertur fierent et aggerentur (sic) una cum prescriptis Testibus presens interfui eaque sic fieri vidi et audiui.Idcirco hoc presens Instrumentum ad peticionem dictorum dominorum Canonicorum exinde confeci quod manu propria scripsi et in hanc publicam formam redegi ac signo meo cum nomine proprio solitis et consuetis signaui rogatus, in fidem et testimonium omnium premissorum.

Source Fulltext: FAIGL, Herzogenburg (Wien 1886) S. 286-288