ICH Peter von Chueffarn. hern Reynwatz Svn von Chueffarn dem got genod vnd ich Ossanna Petreins Swester von Chueffarn. vnd alle unser erben wir veriehen offenleich mit dem brief alle den die in lesent sechnt oder horent lesen die nu lebent vnd hernach chumftig sind das vnser Vetter Ott von Chueffaren dem got genad durch hayl sein vnd alle seiner vodren Selle willn ze der zeit do er ez mit recht wol getuen mocht Geben vnd geschafft hat dem heiligen herren sand Gorigen zu dem Goczhaws gen hertzogenburch den Chorherren auf ir Oblay seines rechten aygenhafften gu^ets zwai tail aynes weinczurels geriches gelegen ze chueffaren da ze der zeit dor auf gesezzen ist Hans der Grosmayr dar vmb daz si hinfu^er ewichleichen sein vnd alle seiner vodren sellen begen schulln ain ewigen iartag mit gesungner vigilii vnd dez Morgens mit gesungner Sellemesse vnd schol daz geschechen alle iar in den acht tagen vor sand Merten tag oder in den acht tagen hin nach. Nu hab wir ich egenanter Peter vnd ich vorgenante Osanna sein Swester den egenanten geistleichen herren den driten tail vnd den vbrigen tail an dem obgenanten Weinczurel gericht zu irn zwain tailen die in geschafft sind ze chauffen geben vmb Subenthalb phunt wienner phennig der wir gancz vnd gor von in gericht vnd gewert sein ze rechten tegen also beschaidenleich daz si fu^erbaz mit dein vorgenanten Weinczurel gericht vnd waz dar zu grho^ert allen irn frum damit schaffen schulln mit verchauffen mit versetzen vnd geben wem si wellent an alln ierrsal vnd sei auch wir ich egenanter P e te r vnd ich vorgenante Osanna dez obgenanten Chauffes vnd dez drittails an dem obgenanten Weinczurel gericht ir recher scherem vnd gewer fu^er alle ansprach als aygens vnd chauffes recht ist vnd des landes recht in Osterreich. Wer awer daz daz den obgenanten chorhern vnd dem Goczhaws ze herczogenburch an dem obgenanten Weinczurel gericht des obgeschribn drittails vnd waz darzu gehort icht abgiech oder ob se icht chrieg oder ansprach daran gewunen mit recht von wem daz wer daz schulle wir in alles ausrichen vnd widercheren an alle ir mue vnd schaden vnd schulln si daz haben auf vns vnd auf unsern erben vnuerschaidenleich vnd auf alle dem guet daz wir haben in dem land ze Osterreich oder wa wir daz haben wir sein lembtig oder tod. vnd darvber geb wir ich egenanter Peter von Chueffaren den vorgenanten Chorherren von herczogenburch den brief versigelt mit meinem anhangunden Insigel vnd ich vorgenante Osanna verpind mich vnder meines wirts Insigel Niclas des Hinderholczer mit mein trewn alles daz stet ze haben das vor an dem brief geschriben stet der den brief mit seinem anhangvnden Insigel auch bestet hat. Vnd der sach dez Gescheffts vnd dez Chauffes ist geczeug Reynbat der Stiffelscharaer mit seinem anhangvndem Insigel ym an schaden. Der brief ist gebn nach Christi gepurd drewzehen hundert iar darnach in dem acht vnd Svbenczigisten iar dez Mitichens nach sand Lucein tag.

Source Fulltext: FAIGL, Herzogenburg (Wien 1886) S. 288-289