ICH Cholman der Hyerzze vnd all mein erben wir veriehen offenwar mit dem prief allen den die in lesent sehent oder ho^erent lesen, die nu lebent vnd hernach chunftich sind. daz wier mit wolbedachtem mu^et vnd gu^etem willen zu der zeit do wir ez wol getu^en mochten recht vnd redleich verchauft haben vnsers rechten vreyn aygns. daz wir gechauft haben von der Erbern vrawn. vrawn Elspetn der Haewslerin von Raezzing. zehen schilling wynner phennig geltz die gelegen sind ze Chappeln an der Persnik auf aechern vnd auf vberlent. da von dez ersten dient Ott der leytgeb ze Chappeln von ainem jeuch aindlef phennig. vnd von ainer wysen acht phennig. Ians der Sygharter do selbs von drin jeuchen drey vnd dreizzig phennig. Fridreich Perharter von Rezzing von aim jeuch ayndlef phennig. Sneblinger von Rezzing von aim jeuch ayndlef phennig. Poltinger von Rezzing von aim jeuch ayndlef phennig. Georig der lempler von Rezzing von aim jeuch ayndlef phennig. Christanin von Rezzing von aim jeuch ayndlef phennig. Philipp der Pechk von Chappeln von aim jeuch ayndlef phennig. Chunrat schu^ester von Rezzing von aim jeuch ayndlef phennig. Chunrat Stetner von Rezzing von aim jeuch dreyzehn phennig. Jans im lehen von Chappeln von aim jeuch ayndlef phennig. Ru^edel von Chatzenperig von aim jeuch ayendlef phennig. Larenz in der Aw von aim jeuch ayndlef phennig. Artolf Herwortz sun von Chappeln von aim garten acht phennig. Elbel von O^eczestorf von aim jeuch ayndlef phennig. Enenchel von Rezzing von zwayn jeuchen achtedhalben vnd zwainczig phennig. Wolfhart talvogel von Chappeln von aim halbn jeuch fumf phennig. Darnach von zwain behausten gu^etern die auch gelegen sind zu Chappeln vnd de zeit aufgesezzen sind Christan vnd Wolfhart der Talvogel. da von dient man zehen schilling wynner phennig. die ich auch gechauft han von der egenanten vrawn Elspeten der Ha^euslerin da von dez ersten dient Wolfhart der talvogel ze Chappeln von aim viertail ains hofs an funf funf schilling phennig. Christan Nyclas sun do selbs von aim halbn virtail ains hofs dritthalben vnd Sybenczig phennig. Jans der Enenchel do selbs von aim halben viertail ains hofs auch drithalben vnd Sybenczig phennig. Von den obgenanten zehen schilling geltz han ich in auch ze chauffn gebn fumfczig phennig geltz zu^e dem gelt daz man dient von den aechern vnd vom vberlent. als vor geschribn stet. vnd also die vorgenanten zehn schilling geltz mit allen iren rechten vnd nuczen vnd dar zu^e geho^ert vnd als wir de in rechter aygns gwer her pracht habn ez sei gestift oder vngestift versucht oder vnuersucht ze veld vnd ze dorf als die vorgenanten gu^eter von alter her chomen sind vnd wo di gelegen sind an allen auszug hab wir recht vnd redleich verchauft den Erbern Geystleichen herren den Chorherren ze Herczogenburch auf ir oblay vmb achtzehn phunt wyenner pfennig der wir gancz vnd gar von in verricht vnd gewert sein ze rechten taegn. Also beschaidenlich daz si fu^erbaz mit den obgenanten gu^etern allen irn frum schaffen schulln mit verchauffen mit versetzen geben wem si wellent an allen irrsal. vnd dez vorgenanten verchauften geltz sei wir ir rechter Scherm vnd gwer fu^er alle ansprach als chaufs vnd aygns recht ist vnd des landes recht in O^esterreich. Waer aber daz daz in an den obgenanten zehn schilling geltz icht abgieng oder ob si icht chrieg oder ansprach gewunen mit recht von wem daz wer daz selb schull wir in alles ausrichten ablegen vnd widerchern gancz vnd gar an all ir mue vnd schaden vnd schullen si daz haben auf mir vorgenanten Cholman vnd auf aller der hab die ich hab oder lazz in dem Land ze Osterreich, ich sei lemptig oder tod. Dar nach ich vorgenanter Cholman der Hyerzz vergich auch, daz ich den obgenanten Chorherrn gebn han ain phunt phennig geltz mit aller meiner erben gu^etem willen vnd gunst durch mein vnd meiner wirtin vnd meiner vodern sel willen auch auf ir Oblay. vnd daz dient man vber die fumfzig phennig von den obgenanten behausten gu^etern als vor geschriben stet. Dar vmb schulln si mier vnd meiner wiertin vnd meiner vodern seln alle iar iaerleich hin fu^er ewichleich ein ewigen iartag begen des na^ehsten montags nach sand Veytes tag. des Abencz mit gesungner vigilii des morgens mit gesungner selmesse vnd daz si daz alles volfu^eren daz enphilich ich in vnd dem ganczen Conuent ze Herczogenwurg vnd alln irn nachchomen auf ir trew als si got antwurten dar vmb schulln am jungisten tag. Daz vorgenant gelt alles dient man auf sand Michels tag. Daz aber der chauf vnd die handlung also stet vnd vnczebrochen beleib dar vber gib ich vorgenanter Cholman den obgenanten Chorherrn ze Herczogenwurch den prief versigelt mit meinem anhangunden Insigel. Vnd des sind geczeug der Erber herr her Wernhart der Drugsetz vnd mein Sweher Ott von Ayno^ed mit irn paidn anhangunden Insigeln in paydn an schadn. Der prief ist gebn nach Christi gepu^erd dreuzehn hundert iar dar nach in dem Newn vnd Subenczigistem iar an sand Stephans tag als sein heyliger leichnam ist funden warden.

Source Fulltext: FAIGL, Herzogenburg (Wien 1886) S. 291-293