Ich Stephan der Pokch von Chueffarn vnd ich Margret sein hausurawe vnd all vnser erben wir veriehen offenbar mit dem gegenbu^ertigen brief daz wir mit wolbedachtem mu^et vnd gutem willen zu der zeit da wir iz wol getu^en machten on all hinderung durch got vnd durich vnser vnd aller unserr vodern sel willen geschaft vnd geben haben vnd geben auch mit dem brief wan daz ist daz got v^eber vns paydew gepew^et daz wier mit dem Tod abgen in dem selben Iar vor den nu^ecze oder dar nach, den erwirdigen geistleichen Herren den Chorherren ze Herczogenburch auf ir Oblay ain phunt wienner phennig on drey phennig de gelegen sind cze Chuffarn in dem darf vnd auf dem perig da pey der de gemain haist die her nach gescriben sind vnd daz allez vnser rechtz aygen ist daz ich vnd mein vorgenantew Hawsurawe den vorgenanten Herren geben haben ob wier is versporen mugen des ersten Peter Viereck von ainer Hofstat Sechczig phennig vnd ain gans an sand Merten tag oder funf phennig vnd ze Phingsten sechz cha^es oder new^eri phennig de selbig Hofstat geit an funfczehen phennig vnd ab funfczehen phennig vnd schol on allew stewr sein. Chunigund Thoman des Sneyder Hawsurawe von ainer hofstat zehen phennig an sand Merten tag zway hu^ener oder acht phennig an Sand Blasen tag de hofstat geit fu^enf phennig ab vnd auf fu^enf phennig vnd schol auch sein on allew stew^er. vnd wann dew vorgenanten holden erst auf enphahen nach der vorgenanten geber tad so schol yegleichew hofstat geben dem Oblaymaister ainen gedench phennig ze dem ainen mal. Dar nach auf v^eber lent. Nyclo pinter Newn phennig von aim ackher der haist dacz dem hangunden stain an sand Mertentag vnd Ludweygainhu^en oder vier phennig an sand Blasen tag. Stephan der Pokch Newn phennig an sand Mertten tag von aim ackher ze dem hangunden stain vnd ain hu^en an sand blasentag oder vier phennig. Margret Vlreichz Jacobz Hawsfraw von aim ackher funf phennig an sand Merten tag vnd ain hun an sand Blasen tag oder vier phennig vnd von aim halben jewch auf dem perig zwen phennig an sand Merten tag. Ott von Hawshaim von ainem jewch fünf phennig an sand Merten tag ain hu^en an sand blasen tag oder vier phennig. Jans Wolfhart von darflein von aim halben jeuch drithalben phennig am fochenperig an sand Merten tag vnd zwen phennig fu^er ain halbs hun an sand blasen tag, Lu^edel Weber von darflein von aim halben jeuch an sand Mertentag drithalben phennig vnd zwen phennig an sand Blasen Tag. Stephan Amman von aim halben jeuch drithalben phennig vnd ain halbz hu^een oder zwen phennig an sand Blasen Tag. Symon Phanzagel von aim weingarten am perig zwen phennig an sand Merten tag, vnd ain hu^en an sand Blasen Tag oder vier phennig. Fridel der Gigling aydem von aim Weingarten am perig vier phennig an sand Merten tag. Chu^enigund Sneyderinn von aim Weingarten im Hungerveld drey phennig an sand Merten tag. Chunczel der Gemain von aim Acker drithalben phennig am Vohenperig an sand Mertentag vnd ain huen an sand blasen Tag oder vier phennig. Stephan der pochk von aim acker am perig funf phennig vnd ain huen an sand Blasen tag. auer von ainem jeuch funf phennig an sand Merten tag vnd an sand Blasen tag ain hu^en oder vier phennig. vnd von A^eckhern vnd Weinga^erten dew da haissent dew gemain drey vnd dreizzig phennig daz macht sdrittail von der gemain vnd waz noch gestift wirt in der gemain sdrittail der ich stifter vnd sterer pin daz in dew gemain geho^ert den dinst dient man an sand Merten tag von der gemain vnd an sand Blasentag funftzehen phennig fu^er halbew (sic) hu^ener von dem drittail auz der gemain. Die vorgenanten gu^eter vnd gu^elt alz vor an dem prief geschriben stet der schulle sich die obgenanten Chorherren vnterziechen ze irr Oblay mit alle den eren rechten vnd nuczen die dar zu gehorent ze veld oder ze dorf versucht vnd vnuersucht gestift oder vngestift wie so daz genant ist oder wo daz gelegen ist an allen ausczug vnd schullen stiften vnd steren vnd darzu daz in dew gemain geho^ert wann daz ist daz ich vorgenanter Stephan der Pockch vnd mein Hausfraw mit dem Tod abgegangen sein. also mit ausgenommen wortten daz se mir vnd meiner Hawsvrawn vnd allen meinen vadern allew iar iaerleich hin fu^er ewichleich ein ewigen Iartag begen schullen an Sand Clementen Tag des Abencz mit der Vigilig dez Margen mit dem Selampt vnd pin auch vorgenanter Stephan der Pockch vnd mein erben der obgenanten gu^elt vnd gu^eter rechter scherm vnd gewer fu^er all ansprach alz aygens vnd gescheftes recht ist vnd dez Landes recht in Osterreich, vnd darv^eber geb wir den vorgenanten herren von Herczogenburg den brief versigelten mit meinem anhangunden Insigel vnd dez sind gezewg her Hans der Newnhofer von Talarn richter zu^e den zeitten zu Chu^effarn vnd Peter hern Reinbocz sun von Chu^effarn mit iren anhangunden Insygeln in payden an schaden. Der prief ist geben nach Christi Gepurd drewczehen hundert iar dar nach in dem Newn vnd Sybenczigstem Iare an Sand Clementen Tag.

Source Fulltext: FAIGL, Herzogenburg (Wien 1886) S. 293-295