ICH Hans von liethenstain vnd alle mein erben wir veriehen offenbar mit dem brief alle den die in lesent sechent oder horent lesen die nu lebent vnd hernach chvmftig sind daz wir . . . recht vnd redleich verchaufft haben vnsers rethen ledigen vreien aygens vnsren weingarten der gelegen ist dacz Inczestorff ob dem puerchstal genant der prait acker als wir den von meinem pru^eder andren von liethenstain getailt haben vnd als er mir an geleichen tail geuallen ist vnd als er ausgemaricht vnd gestaynt ist mit alle dew vnd dar zu^e geho^ert ez sei gestift oder vngestift versucht oder vnversucht wie daz genant ist an allen auszug als wir ez in rether aigens gewer herpracht haben also hab wir ez alles verchaufft vnd geben dem beschaiden Mathesen von hederstorff vnd sein erben vmb ayns vnd dreizzik phunt wienner phennig der wir gancz vnd gar verricht vnd gewert sein ze rethen tegen also beschaidenleich daz er vnd sein erben fu^erbas mit dem obgenanten weingarten allen irn frum damit schaffen schullen mit verchauffen mit verseczen schaffen geben wem sew wellent an allen irrsal vnd durch pezzerr sicherhait seczen wir vns ich vorgenanter Hans von liethenstain vnd vnser erben vnverschaidenleich vber den obgenanten Weingarten vnd als daz das dar zu^e geho^ert dem vorgenanten Mathesen vnd sein erben ze rethem scherem vnd geweren fu^er alle ansprach . . . vnd daz der Chauff also stet vnd vnczebrochen beleib dar vmb so geben wir ich vorgenanter Hans von liethenstain dem obgenanten Mathesen vnd sein erben den brief versigelt mit meinem anhangunden Insigel vnd dez sind geczeug mein pru^eder andre vnd mein vetter Perenhart von liethenstain mit irn paiden anhangunden Insigeln in an schaden. Der brief ist geben nach Christi gepurd drewzehen hundert iar darnach in dem achczigistem iar dez Samstags vor sand Gorigen tag.

Source Fulltext: FAIGL, Herzogenburg (Wien 1886) S. 298-299