ICH her Peter Otten Sun an dem fu^ert die zeit Capellan ze chrems dacz sand Peter in vnser frawn chirichen Ich vergich offenleich an dem brief allen lewtten lebentigen vnd chunftigen die den brief sehend ho^erend oder lesend daz ich recht vnd Redleich vnd auch zw der zeit do ich es Rechtleich wol ze tu^en het verchaufft han hern Chunrat die zeit Capellan dacz sand Katrein ze Nuzdorf ain halbs leuch weingarten ze Geyrsperg vnd daz do leit ob Nyclas syn von Prunn weingarten vnd daz do ierleich dient den tanpruggner ze Murstetten vier phenning gemainer phenning vnd nit mer. den vorgenanten weingarten alz er geraint vnd gestaint ist vnd als ich in In Nu^ecz vnd Gwer han her pracht in purchkrechtz gwer hab ich in ze chauffen gebn dem vorgenanten hern Chunratn Capellan ze Sant Katrein ze Nuzdorf vmb sechczehen phunt phenning wienner phenning der ich Ganczz vnd gar gericht vnd gewert pin ze Rechten also beschaidenleich daz er hin fu^er da mit allen seinen frum geschaffen mag ze verseczzen vnd ze verchauffen vnd des pin ich sein Rechter scherm vnd gwer fu^er all ansprach . . . vnd das lub ich alles stet ze haben pey meinen trewn an aydes stat vnd des ze vrchund vnd pessern sicherhait Gib ich vorgenanter her peter dem vorgenanten hern Chunratn den brief versigelten mit meinem aygen anhangunden Insigel vnd dar zw hab ich auch vleizzich gepetten den erbern Chu^enratn den freunczhawser daz er der sach geczeug sei mit seinem anhangunden Insigel im an schadn. der brief ist gebn nach christi gepu^ert dreuczehenhundert Iar vnd dar nach indem Czwayvnd Newnczigistem Iar sant Peters tag ze vaschang.

Source Fulltext: FAIGL, Herzogenburg (Wien 1886) S. 339-340