CH Gotfrid von Reycherstorf vnd Chunigvnd mein Hawsfraw vnd all vnser eriben veriehen offenleichen an dem brief allen lewtten lebmtigen vnd chunftigen daz wir nach gutem rat erber lewtt vnd auch mit vnserr frewnt rat vnd gu^etleichem willen zw der zeit do wirs wol tu^en mochten geschafft haben vnsern weingarten der do haizzt der hawndel vnd leit zwischen Ottn des pfoeffleins weingarten vnd thoemleins des Neidleins weingarten ze Reicherstorf vnd do wir alle Iar von dienen dem erbern chunrat dem frewnczhawser zwen phenning ze rechtem purchkrecht an sand Michels tag vnd nit mer vnd auf den vorgenanten schaffen wir ein ewigen Iartag den man alle Iar do von begen schol daczz Nuzstorf dacz dem lieben hern ze sand Johans mit einer vigiln vnd ze morgens mit vier messen vnd yedem hern von der vigill sechs phenning vnd dem schulmaister vier phenning vnd dem pharrer von dem selampt zwelif phenning. vnd sol fu^erhin tragen einen halben emer wein vnd ein hindertail von einem chalb vnd czwen wegg fur sechczehen phenning. vnd der dez Iartagz ausrichter ist der sol oppfern ze ieczlicher mess drey phenning vnd den vorgenanten weingarten vnd jartag sol inn haben nach meinen tegen mein liebe hawsfraw chunigund vnd daz geschefft do von aus Richten alz vor geschriben stet ir lebteg dann nach iren tegen so sol den weingarten vnd Iartag inne haben der eltest vnder meinen frewnden vnd den Iartag ausrichten alz vor beschriben stet. wer awer daz der vorgenant weingarten nit pawleich leg vnd im verczogen wu^ert mit der arbait oder der Iartag an dem herbst nit wu^ert begangen alz vor geschriben stet so sol der pharrer ze Nuzstorf dez weingarten sich vnderwinden mit vnserm gu^etleichen willen an alle widerred vnd an allen chrieg vnd den vorgenanten Iartag redleich aus Richten alz vor geschribn stet. vnd dez ze vrchund geben wir den brief versigelt mit des Rechten Grunthern Insigel dez erbern Chunrat dez freunczhawser Insigel hinder dez Insigel wir vns verpinden alles daz stet ze haben pey vnsern trewn an aydes stat daz vor geschriben stet an dem brief wan wir aigns Insigel nicht enhetten vnd des ist auch geczewg der erber Chunrat der flemming ze Go^eczestorf mit seinem anhangunden Insigel . . . Der prief ist geben nach christi gepu^ert drewczehenhundert Iar dar nach in dem Czway vnd Newnczigistem Iar an sand Augustin tag des lieben lerer.

Source Fulltext: FAIGL, Herzogenburg (Wien 1886) S. 341-342