Gregorius episcopus seruus seruorum dej Dilectis filijs ... Preposito ... Decano et ... Sacriste Salzeburgensibus salutem et apostolicam benedictionem. Sua nobis dilecti filij ... Abbas et Conuentus Lambacensis petitione monstrauerunt, quod, cum ... Abbas et Conuentus de Cremsmunster Patauiensis diocesis contra ipsos ad ... Abbatem de Gersten et eius collegas super quibusdam decimis apostolicas litteras impetrassent, ijdem ex eo sentientes ab eisdem iudicibus indebite se grauari, quod cum ipsi excipiendo proponerent coram eis, quod ... Prepositus sancti Nicolai, quem sibi in assesorem assumere intendebant, inimicus manifestus erat eorum, ac propter hoc ipsum assumere uel ipsius uti consilio non debebant, qui dicti iudices ipsos super hoc audire contra iustitiam denegabant, sedem apostolicam appellarunt, at ipsi iudices eorum appellatione contempta partem alteram in possessionem rerum petitarum perperam induxerunt. Quocirca discretionj uestre per apostolica scripta mandamus, quatinus, si est ita, reuocato in statum debitum, quicquid post huiusmodi appellationem inueneritis temere attemptatum, in causa ipsa iuxta priorum continentiam litterarum appellatione remota ratione preuia procedatis, Alioquin partes ad priorum iudicum remittatis examen appellantes in expensis legitimis condempnantes. Testes autem, qui fuerunt nominati, si se gratia, odio uel timore subtraxerint, per censuram ecclesiasticam cessante appellatione cogatis ueritati testimonium perhibere. Quodsi non omnes hijs exequendis potueritis interesse, duo uestrum ea nichilominus exequantur. Datum Perusij ij. Nonas Martij, Pontificatus nostri Anno Secundo.

Source Fulltext: OÖUB 2 (Wien 1856) S. 676