Nos Heinricus dei gratia Comes Palatinus Reni, Dux Bawarie omnibus presencia inspecturis imperpetuum. Considerantes opus diuine clementie, quo nos dignitatem et nomen principis obtinentes ceteris antetulit, vt nostra regeremus et corrigeremus auctoritate minores et subiectos, in quibus videbatur vel poterat ab equitatis semitis declinari et in hiis possemus nostro mediante testimonio et arbitrio interponere partes nostras, que tam dubii quam dissensionis possunt et poterant materiam complanare. Ecce vt tam diu habita controuersia inter Ecclesiam Lambacensem ex vna parte et Gvndakarum de Storchenberch ex altera super aduocacia sev iure aduocatio dicte Ecclesie in hominibus et possessionibus verteretur, recepta in nos amicabili compositione et a partibus voluntarie approbata finem liti imposuimus memorate videlicet, quod Gvndakarus de Storchenberch accepta quadam summa pecunie, cuius partem sibi dedimus et partem Ecclesia Lambacensis, renunciauit omni iuri, quod sibi competebat vel competere poterat tam in genere quam in specie, in hominibus et possessionibus monasterij supradicti, et pronunciauit ab omni impetitione aduocacie quo ad se et heredes suos dictum deinceps Monasterium pacificum et quietum ita, quod, si ipse vel sua posteritas erronea intentione moti ratione predicti juris dictam Ecclesiam molestarent, ad interesse et dampna quelibet tenerentur, vtpote qui in dicto Cenobio ratione aduocacie, vt pretactum est, vna cum heredibus suis quo ad ius aduocaticum nichil sibi poterit iuris vel consuetudinis vsurpare, firmauit etiam sponsione publica, quod numquam super premissis instrumento vel gracia vtetur, et irritum est, si quid proferet in futurum, immo carebit omni auxilio iuris canonici et ciuilis, quod quicumque a dicta Ecclesia sub nomine aduocati posset exigere aut venire contra cessionem voluntarie et liberaliter promulgatam. Vt igitur in supratacta litis decisione dissensio locum non habeat, presens Instrumentum non solum nostro nec non Nobilis viri wernhardi de Schowenberch ac etiam proprio ipsius Gvndakari, vt contra eum sua confessio sufficiens sit probatio, sigillis placuit conmuniri Cum testibus subnotatis, Qui sunt: Grimoldus de Prising, Heinricus senior de Rorbach, wichardus de Pollenheim junior, jtem wichardus de Pollenheim senior, Ortolfus de Pollenheim, Heinricus de Pollenheim, Sighardus de Lobenstein, Heinricus de volchenstorf, Otto de wolfsekke, Ortolfus de wolfsekke, Christanus de wolfsekke, wernhardus de Slierbach, Haenslinus de Ror, Magister Fridericus Canonicus Ecclesie Ratisponensis, Otto Notarius, Merchlinus de Sneitpach Camerarius. Datum in welsa anno domini Millesimo Ducentesimo septuagesimo septimo, Idus Julii. Acta sunt hec per Heinricum abbatem Cenobii supradicti.

Source Fulltext: OÖUB 3 (Wien 1862) S. 473-474, Nr. 512