Ich Nycla, Stephan, vlrich vnd fridreich dez Michelmans sv^en vergehen offenbar an disem prief, daz wier mit vnserr mveter Elspeten vnd mit vnserr Swester Perchten vnd Elspeten guetem wiln vnd wort vnd nach irem rat vnd mit aller Erben wiln vnd wort tzv der tzeit, do wier iz wol getuen mochten, ze chauffen haben gegeben vnsern Hof ze Gruenpach, der vnser recht aigen gewesen ist, der da leit in Ottnanger pharr, vnd dev Mv^el, dev dar in geho^ert, vnd waz auch sv^est tzv^e Hof vnd tzv Mv^el gehort, iz sei wismad oder wie iz genant ist, versuecht vnd vnuersuecht, ze holtzz vnd ze veld, vnserm Lieben freunt Helmharten von Tuschenperg also, an daz gotzhaw^es ze Lambach in dev Gustray vnser vrawen in daz Liecht vnd avch von dem selben dienst, der von dem vor genanten Hof gehort, schol geben, wer guster ist, ein halphunt phenning alle iar ia^erleich in die Oblay vnd schvl avch daz nicht abgen. der chauf vnd der gewerft ist geschehen recht vnd redleich mit aller der sta^et vnd dar tzue gehort, vnd dar vber tze einem vrchvnd vnd tzv einem tzevg diser sache geben wier disen offen prief versigelt mit vnserm insigel vnd mit vnsers O^eheimes insigel fridreichs dez jnnerseer, nach dez rat der chauf vnd der gewerft ergangen ist, vnd ist daz geschehen, do von Christes purt ergangen warn Tausent iar, drev hvndert iar, darnach in dem tzwai vnd dreizkistem iar dez Samtztags an sand Jacobs tag ze Lambach in dem Chloster.

Source Fulltext: OÖUB 6 (Wien 1872) S. 70f., Nr. 62