Ich Tanquart Tanpech purger ze Wels vergich offentleich mit diesem prief vnd tuen chunt, das ich mit wolbedachtem muet vnd mit guetleichem willn vnd wort aller meiner erben geben han dem spital ze Wels durich got, durich meiner sel hail vnd allen meinen var vadern, ze einem ewigem selgerete mein wis ze Pach, di ich ze rechtem erib von dem gotes haus ze Lambach han vnd da von ich alle jar hintz dem selbn gotes haus zwainzig alt wienner phening an vnser vrown tag ze der dienstzeit ze eribrecht gib, also weschaidenleich vnd mit aufgenommer red, swer phleger des vargenanten spitals ist, der schol di selbn wis alle jar mit wishaien, mit mad, mit anderm werich, vnd dar zue gehort, aus richten vnd verrichten an alle mein mue. Vnd all nutze alt vnd jung, als di ierleich van der wis geuallent, die schol des spitals anwalt auf der wis tailen, vnd halben tail dem spital fassen vnd ich halben tail, swenn aber ich nimer bin, so schullen all mein nutze ledichleich des egenanten spitals an allen chrieg von allen meinen erben sein. Vnd swer dann obrister phleger des offtgenanten spitals ist, der selb schol den durftigen im spital geben an dem achteden tag vnser vrown tag ze der schiedung von der wis ein halbs phunt alter wienner phening, als verr vnd di vnter in geraichen mugen. Gescbech aber, das den durftigen an dem selben tag das halb phunt pbening nicht geben wurd, schullen mein nachst vreunt, di dann lebunt sind, sich der vargeschriben wis vnterziechen mit vollem gewalt von dem spital in ir gewalt, vnd schullen chainen chrieg noch ansprach von dem spital vnd von den purgern darvmb leiden noch gewinnen, sev schullen aber den durftigen im spital alle jar das e geschriben halbes phunt phening an dem selbn tag von der wis geben vnd raichen, als var geschriben ist ze hilf meiner vnd aller meiner vaderen sel. Das dem spital di sach also stet vnd vnuerchert weleib, dar vber ze einem waren vrchund gib ich disen prief wesigelten mit der stat jnsigel ze Wels anhangundem vnd ich Tanquart mit meinem anhangundem jnsigel. Der prief ist geben ze Wels, da vergangen waren von Christy gepurd dreutzechen hundert jar, dar nach inn dem siben vnd vierzigistem jar an sand Merteins tag.

Source Fulltext: OÖUB 7 (Wien 1876) S. 34f., Nr. 36