Ich Lienhart von Marspach, zsten zeiten pfleger ze Obernperg vergich offenbar mit disem brief allen lauten, daz fu^er mich vnd fu^er meinen richter ist chomen her Dy^etmar der probst ze Richersperg von seinen wegen vnd von seines goczhauzz wegen, vnd hat auzgetragen mit dem recht daz geschaeft, daz di erberg fraw fraw Chunigunt di Schalchamerinn hat geschafft ab irer sel zsten zeiten vnd sis wol getun macht mit irr su^en vnd pesten freunt rat vnd willen auf dem haus vnd grunt ze Obernperig, da si selben ist inn gesezzen, pei dem ersten schu^of si dem gotzhaus ze Richersperig zehent pfunt, darnach dem gotzhaus ze Aspah zehen pfunt, vnd di selben zehen pfunt hat der vor genant probst ze Richersperig gewaruen von dem abt vnd von dem gotzhaus ze Aspach, vnd hat im daz auf gegeben in der schrann mit meines richters hant. Darnah schuf si A^eckherlein dem Hager irm ennichlein zehen pfunt, vnd di selben zehen pfunt schuf er an seinen lesten zeiten ab seiner sel zu^e rechtem selgera^et dem gotzhaus ze Richersperig vnd seinen geleichen erbtail, daz virtail an dem vor genannten haus vnd grunt ze Obernperig. Item hat auch daz recht gesait, ob er darauf icht pauet, daz ein notdurft wa^er, daz schol man im widerchern an der losung nah der purger rat vnd nah ander erber lau^et rat. Vnd daz also gehandelt sei vor mir vnd vor den purgern vor meinem richter mit rechtem recht dem gotzhaus ze Richersperig daz vor genant geschaft mit meines richters hant ingeantwurt sei, gib ich disen brief versigelt mit meinen insigel. Der geben ist tausent iar drew hundert iar in dem zwai vnd fu^emftzigisten iar an sant Vincententag.

Source Fulltext: OÖUB 7 (Wien 1876) Nr. 269, S. 275f.