Ich Toman von Praitenpuech und mein hawsfraw Elspet verjehen offenbar mit dem brief allen leuten, das uns der erberig herr her Dietmar probst ze Reichersperg und das convent daselbs lassen habent ir tail zehentz ze Praitenpüch ze flust und ze gewin klainen und grozzen von hinn untz auf die liechtmess die schirst köment, dem ain nutz umb zwelif mütt traides Newnsteter mazz sechs mutt chorns und sechs mütt haberns die wir sew gantz und gar gewert und gericht haben. Wer aber das in das leibgeding inner der zeit das wir von in haben ledig würd, so sol ich vorgenanter Toman den hof ze Praitenpuch und den gegentail des zehentz von im wegen auch inne haben untz auf die liechtmess, und sol darumb gein in leiden nach vier man rat der im yeder tail zwen nympt, und was die darumb sprechent da sol es pey beleiben, und wann sich die vorverschriben vrist verlauft und verget, so ist in ir zehent loz und ledig und haben wir nichtz mer darauf ze sprechen weder klain noch groz, und mügen den lassen mit unserm willen wem si wellent. Und ze urchund geben wir in den brief versigelten mit meinen vorgenanten Toman anhangundem insigel, der geben ist nach Kristes gepürd drewtzehen hundert jar darnach in dem ächt und sechtzkisten jar an sand Mathias tag in der vasten des heiligen zwelif poten.

Source Fulltext: OÖUB 8 (Wien 1883) Nr. 371, S. 364f.