Nos Albertus Dei et apostolice sedis gracia episcopus Pataviensis venerabili in Christo preposito monasterii in Reichersperig ordinis sancti Augustini canonicorum regularium nostre diocesis salutem et graciose voluntatis affectum. Notorium est et insinuacione indigere non credimus, quod nos ob hostiles inpugnaciones et graves guerrarum molestias quas pro defensione jurium ecclesie nostre notissime sustinuimus et sustinemus nec non importabilia debitorum inde necessario contracta onera dampnaque gravia cottidie successoria que vires et ejusdem ecclesie nostre facultates extenuant penitus et pertenuant, urgente necessitate inevitabili a te et aliis subditis nostris licet inviti karitativum cogimur subsidium postulare. Dilectioni itaque tue nomine caritativi subsidii octo marcas argenti vel pro marca duas libras dennariorum wiennensium solvendas nobis infra hinc et festum beati Galli proximo affuturum duximus imponendas. Quare eandem dilectionem tuam monemus requirimus et hortamur indomino, quatenus premissum pro pensatis conpassionis affectum dictam summam pecunie infra terminum memoratum quem tibi pro primo secundo tercio et peremptorio termino ac monicione canonica prefigimus benigne persolvas et caritative, ut devocionem tuam exinde non imerito conmendare valeamus. Alioquin lapso dicto termino et dicta canonica monicione premissa te ab ingressu ecclesie suspendimus in hiis scriptis ad graviores nichilominus penas processuri, si quod absit tua in hac parte remissio id exposcit. Datum Patavii die undecimo (XI) mensis septembris anno domini (M° ccc° lxix°) millesimo trecentesimo sexagesimo nono.

Source Fulltext: OÖUB 8 (Wien 1883) Nr. 438, S. 433f.