C. In nomine sancte et indiuidue trinitatis. Reinmarus sancte patauiensis ecclesie episcopus omnibus christi fidelibus in perpetuum. Debitum pastoralis officii efficacius exequimur, si uiros ecclesiasticos et religiosas domos in sua iusticia paterna prouidentia fouentes et eorum indempnitati circumspecte consulentes facultates et iura ipsorum inuiolata eis precipimus obseruari. Huius rei consideratione inducti ecclesiam, que domus sancti Floriani dicitur, barbarica quondam inuasione desolatam sed studio quorundam predecessorum nostrorum, Eigilberti uidelicet, Altmanni, Ovdalrici pie recordationis pontificum in pristinum statum religionis reformatam et priuilegiis ipsorum sufficienter communitam nos quoque in nostre protectionis munimen suscipimus et quod ab ipsis salubriter prouisum est, nos ob reuerentiam ipsius uenerandi martyris Floriani nostra quoque auctoritate corroborare cupientes confirmamus eidem ecclesie et fratribus ibidem deo militantibus tam ea, que ab antecessoribus nostris ipsis dinoscuntur collata, quam et illa, que in ipsius monasterii desolatione prius quidem distracta sed prouidentia antecessorum nostrorum tandem sunt recollecta, nec non et ea, que ab aliis christi fidelibus iam nunc ipsis tradita uel postmodum sunt conferenda. Igitur ne cuiuslibet inuasoris manus temeraria ad possessiones iam dicti monasterii uiolenter diripiendas se aliquando quasi inpune presumat extendere, auctoritate dei omnipotentis et nostra confirmamus iam dicto monasterio et fratribus ibidem deo famulantibus ecclesias, decimas, predia et omnia, quecunque tempore confirmationis huius a nobis facte iuste et legaliter collata possederunt, ex quibus quedam presenti scripto confirmando annotare duximus, sed ea primum, que ab antecessoribus nostris ipsis sunt collata, inter que maximum et precipuum est Parrochia, in qua ipsum beati Floriani martyris monasterium situm est, ab antecessoribus nostris pridem fratribus supradicti monasterii tradita et pleno iure priuilegiis confirmata ita, ut prelatus ipsius monasterii ad curam plebis parrochialis unum de confratribus suis, quem ad hoc ydoneum iudicauerit, potestatem habeat auctoritate sua instituendi et cum expedierit, destituendi et in omnibus ipsius parrochie terminis tam cultis quam colendis decima tota et indiuisa exceptis triginta sex domibus. Ad Almisuelt uilla tota cum omnibus ad eam pertinentibus et due partes decimationis in omnibus terminis ipsius parrochie tam cultis quam colendis. Ad Sunilburch ecclesia cum dote ipsius, manso uno scilicet et dimidio et due partes decimationis. Curia in Enzingen. Curia ad S. Stephanum iuxta Waeninpach cum omnibus suis pertinentiis. Ad Ebilsperch duo mansi et dimidius cum omnibus illuc pertinentibus. Ad Strumingen augea et viginti tres decime portarie in diuersis parrochiis site, Amistetin una, Steuinsharde una, Aspach una, Glunich una, Sibenbach una, Oftheringen una, Geroldistorf una, Herisingen una, Tenin due, Terinbach una, Liuntingen una, Lintze una, Chirchdorf una, Rute una, Meirstorf una, Horbach una, Tauirsheim una, Pulgarn una, Luffenberch una, Rieda una, Mittirchirchen una, Saehsinchirchen una et in duabus ecclesiis Lintze et Tauirsheim decima uini tota. Has inquam donationes ab antecessoribus nostris legitime factas nos quoque ratas habentes et confirmantes ecclesiam in Gutowe et in omnibus ipsius parrochie terminis tam cultis quam colendis decimam dimidiam ipsis fratribus contulimus. Preterea predia, que uel studio predecessorum nostrorum in ipsius monasterii reformatione usibus fratrum sunt restituta uel ab aliis fidelibus iam sunt collata, nos etiam in protectionem nostram suscipientes confirmamus supradictis fratribus cum omni utilitate perpetuo possidenda, villam scilicet sub ipso monasterio sitam cum omnibus ad eam pertinentibus, Waelhelingen mansum unum et dimidium, Vrienlivtin mansum unum et dimidium, Curiam in Phaffenhouin cum omnibus eius appendiciis, Curiam in Lilinhouin cum omnibus ad eam pertinentibus, Curiam in Gerlantingen, Ad Gomerichingen duos mansus et dimidium cum pratis, pascuis, siluis. His prenominatis adicimus et confirmantes predium in Windiberge, quod quidam nobilis homo et religiosus ualde Eppo. nomine instinctu sancti spiritus commonitus prenominato monasterio contulit cum omnibus ad ipsum predium pertinentibus, pratis scilicet et pascuis, aquis aquarumque decursibus, piscationibus et siluis, que protenduntur usque ad terminos boemie in fluuium, qui Wltha uocatur, et duas ecclesias parrochiales in ipso predio sitas, ecclesiam S. Marie in Waltchirchen et ecclesiam S. Petri cum capellis ratione filiationis ad eas spectantibus et hec omnia per manum imperatoris Heinrici huius nominis quinti tradidit et priuilegio suo confirmauit. Decimas uero ipsarum ecclesiarum, quas de manu antecessorum nostrorum in beneficio habuit, antecessori nostro pie recordationis Ovdalrico episcopo ea conditione resignauit, ut eas prefato monasterio conferret, quod et ad peticionem ipsius fecit. Confirmamus et fratribus ipsius monasterii ecclesiam in Munichspach, quam ipsis quidam nobilis homo fridericus nomine cum dote ipsius ecclesie tradidit, et ecclesiam in Wartperch, quam ipsis quidam nobilis homo Sigehardus nomine cum dote ipsius ecclesie tradidit, et decimam, quam de manu antecessorum nostrorum in beneficio habuit, ipsam etiam iam dicto predecessori nostro Ovdalrico episcopo resignauit, qui eam ad peticionem ipsius prefate domui S. Floriani martyris tradidit. Nos igitur hec omnia et nunc fratribus predicti monasterii collata necnon postmodum ipsis iuste conferenda in protectionem nostram suscipientes omnem, quam de indulgentia predecessorum nostrorum gratiam et iusticiam habuerunt, ipsis plene recognoscimus ratum et firmum habentes, ut prelatus ipsius monasterii ecclesias parrochiales ecclesie sue et nunc collatas necnon et postmodum conferendas clericis secularibus, quando uacauerint, pleno iure conferat nullum super cura animarum suscipienda uel episcopo uel suo archydiacono representans. Ecclesiam uero S. Marie in Waltchirchen, quia conuentualis ecclesia esse debet, uni de confratribus suis uiro discreto et religioso pleno iure committat adiunctis sibi duobus uel tribus de collegio suo uiris religiosis, qui et plebem parrochialem in diuinis et adiunctos sibi fratres cum familia competenti de prouentibus dotis et decimarum ipsius cellule tarn prouide procuret, ut, siquid residui super necessaria domus annuatim possit colligere, totum,ad utilitatem domus S. Floriani fideliter studeat redigere. Confirmamus etiam fratribus sepedicti monasterii gratiam ipsis ab antecessoribus nostris collatam, ut, quicunque ministerialium nostrorum seu de familia nostra predia sua ad nos iure dominii spectancia illuc conferre decreuerit, eius donatio nostra auctoritate in perpetuum rata maneat et inconuulsa. Siquis etiam de dyocesi nostra ibidem sepulturam sibi delegerit, libere non obstante alicuius plebani nisi legitima contradictione sepeliatur. Si quando etiam antefactam ecclesiam suo contigerit pastore uiduari, fratres ipsius ecclesie de altero prelato sibi substituendo secundum canonicas sanctiones libera gaudeant electione. Preterea confirmamus gratiam prememorato monasterio ab antecessoribus nostris factam, ut nullus successorum nostrorum nec alter quispiam siue secularis siue ecclesiastica persona aliquem ibi, nisi quem prelatus ipsius loci petierit, ordinare presumat aduocatum, qui etiam, si grauis ipsis et iniuriosus exstiterit et admonitus emendari noluerit, ad peticionem ipsius prelati ab episcopo amoueatur et alter substituatur. Vt ergo huius nostre confirmationis institutio in perpetuum rata maneat et inconuulsa, hanc inde paginam conscribi et sigilli nostri inpressione iussimus insigniri. Si quis igitur, quod deus auertat, contra hanc nostre confirmationis formam qualibet temeritate aliquid agere presumat, nouerit se indignationem omnipotentis dei incursurum et cum Dathan et Abyron in eterna dampnatione porcionem habiturum. Conseruantibus autem pax et misericordia a deo et in presenti et in futuro seculo conseruetur. Amen. Datum Patavie Anno ab incarnatione domini MCXXII. Indictione VIIII. XV. kalendas Aprilis, Anno pontificatus nostri VIII. Regnante Heinrico imperatore huius nominis V. feliciter. Amen.

Source Fulltext: OÖUB 2 (Wien 1856) S. 152-155