C. In nomine sancte et indiuidue trinitatis reginmarus sancte patauiensis ecclesie episcopus omnibus christi fidelibus in perpetuum. Debitum pastoralis officii efficacius exequimur, si uiros ecclesiasticos et religiosas domus in sua iusticia paterna prouidentia fouentes et eorum indenpnitati circumspecte consulentes facultates et iura ipsorum inuiolata eis precipimus obseruari. Huius rei consideratione inducti ecclesiam, que domus sancti floriani dicitur, barbarorum quondam inuasione desolatam, sed studio quorundam predecessorum nostrorum Eigilberti uidelicet, Altmanni, O^udalrici pie recordationis pontificum in pristinum statum religionis reformatam et priuilegiis ipsorum sufficienter conmunitam nos quoque in nostre protectionis munimen suscipimus et quod ab ipsis salubriter prouisum est, nos ob reuerentiam ipsius uenerandi martiris floriani nostra quoque auctoritate corroborare cupientes auctoritate dei omnipotentis et beati Stephani prothomartiris et nostra confirmamus eidem ecclesie et fratribus ibidem deo militantibus omnia iura et priuilegia sua, ecclesias, decimas, predia tam ea, que ab antecessoribus nostris ipsis dinoscuntur collata, quam et illa, que in desolatione ipsius monasterii prius quidem distracta sed prouidentia predecessorum nostrorum postmodum utilitati ipsorum sunt restituta, nec non et ea, que ab aliis christi fidelibus iam nunc collata uel postmodum ipsis sunt conferenda, ne cuiuslibet inuasoris manus temeraria ad possessiones eorum uiolenter diminuendas se aliquando quasi inpune extendere presumat. Confirmamus etiam fratribus supradicti monasterii omnem quam antecessores nostri gratiam et iustitiam ipsis contulerunt uidelicet, ut prelatus ipsius monasterii parrochiam, in qua ipsum monasterium situm est, uni de confratribus suis, quem ad hoc ydoneum iudicauerit, auctoritate sua conmittat, quem et si negligentem inuenerit, amoueat alterum substituendo, Ecclesiam etiam sancte Marie in waltchirchen, quia conuentualis ecclesia esse debet, uni de confratribus suis uiro discreto et religioso pleno iure conmittat duobus uel tribus sibi de collegio suo fratribus adiunctis. Reliquas vero ecclesias parrochiales ecclesie sue uel nunc collatas uel postmodum conferendas clericis secularibus, quandocunque uocauerint, pleno iure conferat nullum super cura animarum suscipienda uel episcopo uel ipsius archydiacono representas. In aliis autem possessionibus monasterii prediis uidelicet, siluis et vinetis prelatus ipsius loci plenam habeat potestatem cum consilio tamen et consensu fratrum suorum dandi, uendendi, precariandi, conmutandi in omnem utilitatem, sicut conmodius ecclesie sue uiderit expedire non obstante nec factum suum impediente uel episcopi uel ipsius etiam, quem pro tempore sibi elegerit aduocatum, contradictione. Preterea confirmamus ipsis ius a predecessoribus nostris collatum et priuilegiis confirmatum, ut quicunque ministerialium nostrorum siue de familia nostra predia sua ad nos iure dominii spectantia eis conferre decreuerit, eius donatio nostra auctoritate rata maneat et inconuulsa. Si quis etiam de dyocesi nostra ibidem sepulturam delegerit, libere ibi non obstante alicuius plebani nisi legitima contradictione sepeliatur. Si quando etiam antefatam ecclesiam suo contigerit pastore uiduari, fratres ipsius ecclesie de altero prelato substituendo libera gaudeant electione. Confirmamus etiam gratiam sepe dicto monasterio ab antecessoribus nostris factam, ut nullus successorum nostrorum nec alter quispiam siue secularis siue ecclesiastica persona aliquem ibi, nisi quem prelatus ipsius loci uoluerit, ordinare presumat aduocatum, quem cum inutilem sibi senserit et iniuriosum, liceat libere recusare et alium, qui nichil sibi iuris uendicet nomine huius conmissionis, ad placitum suum substituere meliorem. Vt ergo huius nostre confirmationis institutio rata in perpetuum maneat et inconuulsa, hanc inde paginam conscribi et sigilli nostri inpressione iussimus insigniri. Si quis igitur, quod deus auertat, contra hanc nostre confirmationis formam qualibet temeritate aliquid agere presumat, nouerit se indignationem dei omnipotentis incursurum et cum Dathan et Abyron in eterna danpnatione portionem habiturum, Conseruantibus autem pax et misericordia a deo et in presenti et in futuro seculo conseruetur Amen. Datum Lauriacum (sic) Anno ab incarnatione domini M.C.XX.II. Indictione VIIII. XV. kalendas Aprilis. Anno pontificatus nostri VII. Regnante Heinrico imperatore huius nominis V. feliciter.

Source Fulltext: OÖUB 2 (Wien 1856) S. 155-157