Ut de fundatore loci huius et de tempore fundacionis fiat pagine huius inspectoribus certa fides, Sciendum est, quod uir generosus dictus Otto de Machland de claro liberorum sanguine natus temporali quidem substancia locupes (sic) sed uirtutum meritis magis diues tamquam uitis fructifera vineam domini sabaoth duplici palmite fecundauit, duo fundando cenobia, hanc videlicet abbaciam Cysterciensis ordinis et claustrum regularium (sc. Canonicorum) in Walthausen et utrumque satis habunde de suis dotauit rebus, que sibi iusto patrimonii tytulo conpetebant. Fundata est autem hec abbacia temporibus Innocencii pape post sedatum scisma petrileonis. Eo tempore claruit beatissimus pater noster Bernhardus abbas clareuallensis, qui idem scisma sedauit, predicacione et miraculis reges et principes seculi ad subieccionem et obedienciam Innocencii pape inducendo. Eo tempore rexit imperium Chunradus illustris nepos Hainrici imperatoris. Austrie prefuit Leupoldus dux Bawarie et marchio austrie, filius Leupoldi marchionis cognomento pii, qui fundauit sanctam crucem et Nevnburgam, Ecclesiam uero Patauiensem rexit tunc Reynpertus episcopus. Domus itaque ista deriuata est a domo sancte crucis. Anno domini M. C. XXXIII Fundata est sancta crux a predicto marchione Leupoldo cognomento pio.||
Anno domini M.C.XXXVIII. Fundata est domus zwetelensis a nobilibus de chvnring.||
Anno domini M.C.XL.II. Fundata est abbacia in paumgartenberg a predicto nobili Ottone. Anno M.CC.V. Fundata est domus in Campolyliorum ab ultimo Leupoldo duce austrie.

Source Fulltext: OÖUB 2 (Wien 1856) S. 206-207