Rvdolfvs Dei gracia Romanorum Rex semper augustus Omnibus in perpetuum. Equitas racionis expostulat et requirit, vt in eum, qui nos licet indignos ad Regalis throni fastigia sublimauit, nostre consideracionis intuitum deflectentes Ecclesias et ecclesiasticas personas suo sancto seruicio deputatas benigni fauoris gracia iugiter prosequentes, ad libertates eorum seruandas et facultates augendas graciose proteccionis nostre presidium impendamus, Nos offerentes eisdem et in iusticia faciles et in gracia liberales. Nouerit igitur presens etas et futuri temporis successura posteritas, quod accedens ad Regie Maiestatis presenciam Honorabilis Vlschalcus Prepositus Ecclesie sancti Floriani quoddam priuilegium sibi et Ecclesie sue a diuo quondam Friderico Romanorum Imperatore predecessore nostro concessum, non cancellatum, non abolitum nec in aliqua sui parte uiciatum nobis exhibuit petens humiliter et deuote, vt ipsum Priuilegium de uerbo ad uerbum presentibus annotatum confirmare de nostra gracia dignaremur, Cuius priuilegii tenor talis est: (Es folgt die Urkunde Kaiser Friedrich's II. dat. Wien im Februar 1237). Nos igitur, quibus ex assumpte dignitatis officio conuenit, subiectorum fidelium et maxime Religiosarum personarum inuigilare profectibus et saluti, Prefati Prepositi nobis deuoti deuotis precibus inclinati ipsum et Ecclesiam suam cum hominibus et bonis suis omnibus sub proteccionis nostre presidium fauorabiliter colligentes priuilegium suprascriptum, a prefato Friderico Romanorum Imperatore primum tempore Regni sui ipsi Ecclesie traditum et postmodum per eundem de Imperiali beniuolencia confirmatum cum omnibus suis articulis dictis Preposito et Ecclesie de Regali clemencia liberaliter Imperpetuum confirmamus, innouamus et presentis decreti munimine communimus. Nulli ergo hominum, cuiuscumque status aut condicionis existat, liceat hanc paginam nostre confirmacionis et innouacionis infringere uel eidem in aliquo ausu temerario contraire. Quod qui fecerit, grauem nostre Maiestatis offensam se nouerit incursurum, Pena Centum librarum auri expressa superius nihilominus puniendum. In testimonium premissorum et robur perpetuo valiturum presens priuilegium Maiestatis nostre Sigillo duximus roborandum Testibus, qui aderant, nichilominus subnotatis: Venerabiles F. archiepiscopus Salzburgensis et Jo. Chiemensis Episcopus, Honorabilis R. Cancellarius, Illustres Jo. et Al. fratres duces Saxonie, Ot. Marchio Brandenburgensis, Spectabiles viri H. Marchio de Hahperch et H. Comes de Wurstinberch, F. Burchgrauius de Nurenberch et alii quam plures. Signum domini Rudolf, Romanorum Regis Inuictissimi. Datum Wienne per manum Magistri Gotfridi prothonotarii nostri, VIII. Idus Junii, Indiccione VII. anno domini Millesimo ducentesimo septuagesimo nono, Regni vero nostri anno sexto.

Source Fulltext: OÖUB 3 (Wien 1862) S. 498-499, Nr. 540