Quoniam humane nature fragilitas ad dissenciendum promptissima reperitur, ideo consuetudo laudabilis inoleuit antiquorum moribus approbata, ut res gestas scripti series ad eternam memoriam prosequatur. Qua propter ego Chunradus de Hahinpach scire cupio vniuersos presentem paginam inspecturos, quod lis, que inter me et coheredes meos ex vna et dominum prepositum et Conuentum sancti Floriani ex parte altera uertebatur super quibusdam decimis vinearum in Chremsa, ipsis asserentibus, quod easdem olim a patre meo Hadmaro pro quadam summa pecunie comparassent, tandem per discretorum virorum arbitrium taliter est decisa, quod dictus prepositus michi superadderet octo libras patauiensis monete, quod et fecit, et sic ego et coheredes mei omnes videlicet, ad quos predicte decime iure hereditario pertinere uidebantur, liti cessimus firmiter promittentes, quod dicta Ecclesia super eisdem decimis a nobis uel successoribus nostris de cetero inquietari non debeat uel grauari. In cuius rei testimonium presentes litteras conscribi feci sigillorum domini Wernhardi de Schaumberch et domini Hadmari de Liebenstain et patrui mei Rudigeri munimine roboratas testibus subnotatis, qui sunt hii: Dominus Chunradus vuerter, Dominus Lvdwicus schiuer, Dominus Dietricus schiuer milites. Hugo Chertner, Pilgrimus de Asenhaim, Hertwicus de Aschach, Albertus et Heinricus de Aschach et alii quam plures fide digni. Actum et Datum in Aschach Anno domini Millesimo Ducentesimo LXXVIIII. VIII. kalendas Januarii.

Source Fulltext: OÖUB 3 (Wien 1862) S. 512, Nr. 550