Ich Alber von Wesen vnd Hadmar vnd Erchenger mein pru^eder tun allen den chunt, die disen brief ansehent oder lesent, di nu sind oder her nach chu^enftig werdent, daz wir herren Chunraten von Chapell vnd ver Minsla seiner hausfrawen die hub datz Wenpach haben geben ze rechtem aigen vnd schullen der ir gewer sein an aller stat, da si sein bedurffen. Vnd ist, daz in dar an icht ab get, daz schullen si haben auf allew dew vnd wier haben. Daz in daz sta^et vnd vnuerchert beleib, geben wier in disen brief ze einem vrchu^end versigelt mit sta^otichait vnserr Insigel vnd mit den zeugen, die hie geschriben stent: her Ott von Volkenstorf, her Hainreich von Lonsdorf, her Otte von Lonstorf, her Ruger von Hu^ett, her Rudolf von Alharting, Hainreich von Dietreiching, Hainreich von Dietreiching, her Hainreich von Alharting, her Otte von Dietreiching, Reicher von Perchaim. Ich Alber von Wesen vnd Hadmar vnd Erchenger mein pru^eder tu^on chunt allen den, die disen brief an sehent oder lesent, di nu sind oder noch chu^enftig werdent, daz wier herren Chunraten von Chapelle vnd seiner Hausfrawen vrawn Minsla zu aller der sta^etigung, vnd wier in haben getan an vnserm brief auf der Hu^eb ze Wenpach, daz wir in die selben hub auch setzzen fur funftzikch phunt wienner phenning vnd wär, daz in an der aigenschaft icht abgieng, von swelchen sachen daz waer, so schol her Chunrat von Chapelle vnd sein Hausfraw vraw Minsla haben fumftzig phunt wienner phenning auf der vorgenanten hu^eb vnd sein auch der ier gewer an aller der stat, vnd si sein bedu^erffen. Daz in daz sta^et beleib vnd vnuerchert, geb wier in disen brief ze v^erchunde versigilt mit vnserm Insigil vnd mit den zeugen, die hie geschriben stent: her Ott von Volkenstorf, her Hainreich von Volkenstorf, her Hainreich von Lonstorf, her Otte sein pru^oder, her Dietreich der Amman, her Perchtolt von Harthaim, Ruger der Hu^etter, Hainreich von Dietreiching, Reichker von Perchaim.

Source Fulltext: OÖUB 3 (Wien 1862) S. 559-560, Nr. 611