Cum genus humanum ad malum semper existat pronius quam ad bonum, necesse est, ut facta quelibet caucione litteraria perhennentur. Proinde ego Otto dictus wolfstain scire cupio vniuersos, quibus presens pagina ad audiendum oblata fuerit uel legendum, quod, cum status siue disposicio Hv^ebe trans pratum, quod Prv^el dicitur, situate propter uicinitatem Ecclesie sancti Floriani, cui ius proprietatis conpetit in eodem, animo meo ad faciendam ibidem residenciam plurimum conplaceret, vniuersis ibidem Dominis feruenti desiderio supplicaui, ut receptis equiualentibus redditibus ipsam Hv^ebam michi et uxori mee Domine Elyzabeth conferrent titulo personali. Victus igitur Conuentus meis precibus memoratus eandem Hv^ebam nobis ambobus iure precario contulerunt. Nos uero in reconpensacionem dictorum prouentuum ad officium Infirmarie, ad cuius administracionem prefata Hv^eba spectare dinoscitur, duo predia, vnum in Prvk soluens annuatim VII. solidos et alterum in Lorich habens in redditibus vnum talentum proprietatis titulo dedimus perpetuo possidenda Sic videlicet, ut nec in hiis prediis Ecclesie vsibus iam traditis nec in Hv^eba mihi et uxori mee prefate iure personali collata quisquam heredum nostrorum, quos forte dominus adhuc nobis prouiderit, sev quispiam nostrorum Consanguineorum aliquid ius nobis defunctis sibi debeant in perpetuum uendicare. Et ut factum huiusmodi robur obtineat perpetue firmitatis, presentem Litteram cum appensione sigillorum trium Dominorum de volchenstorf, uidelicet domini Ottonis de Chrevtzen, Domini Chunradi de Styria, Domini Heinrici de volchenstorf, cum proprio caream sigillo, Ecclesie tradidi memorate Testibus adnotatis, qui sunt prefati domini de volchenstorf, quorum sigilla littere sunt appensa, Dominus Berchtoldus de Harthaim, Dominus Ditricus de Ebilsperch, Dominus Livtoldus de Wald, Arnoldus et Albertus wolfstain, vlricus de Sinzenperg, Syfridus de welchling, Hainricus Jacober, Heinricus Tobler, Ditricus Walich, Herwordus de Chremsdorf et plures alii, qui eidem facto interfuerunt, audiuerunt pariter et uiderunt. Acta sunt hec anno domini Millesimo CC. LXXXII. In die beate Prisce virginis.

Source Fulltext: OÖUB 3 (Wien 1862) S. 540-541, Nr. 587