Ich iohans von Ku°nring Obrister schenk in Oesterich vergich an disem Brief offenlich allen Liuten, Daz vo^er mein vnd vo^er mein Erbern Liuten betaidingt ist also, daz Ortel der geschrai ze tirenstein vnd sein housfrowe Pericht vnd alle ir Erben von dem weingarten vnder Peilstain gu^etlich vnd gerne gestanden sind vnd der vorgenant weingarten daz Goteshows ze sand Florian redleich vnd recht mit Taiding an geuallen ist ledichleichen vnd daz der vorgenant Ortel vnd sein housfrowe vnd ir Erben vnd alle ir affterchunft dhain gedingen zu dem Egenanten Weingarten Nimmer mer sullen gewinnen vnd pin ich iohans von Ku°nring des vorgenanten Gotshaws scherm vnd geziug Nach des Landes gewonhait in Osterich mit den geziugen, di her nach geschriben sint: Her Joseph Guster ze sand florian, her vlrich pharrer ze sand Michahel, her phillipe pharrer ze tirenstein, her Ditrich von zaucharn, her Hadmar ze Spitz, Rudolf der uoluerawter vnd ander piderber Liute genu°ge, den di wandlung wol chund ist. vnd daz also ditz steet vnd vntzebrochen beleib, gib ich egenanter iohans von Ku°nring dem vor genanten Gotshaws disen brief zu aim vrchu^ende versigelt mit meim Insigel nach Christi gepu^erd vber driwtzehenhundert iar in dem zwai vnd zwainzikstem iar des Samtztages an sand Georgii Tag ze tirenstein.

Source Fulltext: OÖUB 5 (Wien 1868) S. 322-323, Nr. 332