Ich Seyfrid der Zwikchel vnd ich Vlreich zwikchel veriehen vnd tu°n chunt allen den, di disen brief sehent oder ho^ernt lesen, daz wier mit Gu^etem willen vnd mit verdachtem mut zu der zeit, do wier ez wol getu°n machten, vnserm pru°der Fridreichen dem Zwikchel vnd seiner hausfrawn vnd seinen Erben haben gegeben daz aygen auf der Oed vnd alles daz recht, daz dar zu° geho^ert, vmb zehen phunt wienner mu^enzz also beschaidenleich, daz wier noch vnser Erben iem an demselben Gu°t dhain saumung nicht schu^ellen tu°n, ob er ez wolt verchauffen oder versezzen als sein rechtes aigen. Daz iem die rede sta^et vnd vnuerchert beleib, darvmb geb wier iem disen brief versigelt mit vnser paider Insigel. Der red ist gezeug her Hainreich von walsse, her Hainreich von Volkchensdorf, her Marichart der prehafen, her Ott der Schekch, her Meinhart von Sintzenperg, Ha^ertel der Chersperger, Ortolf von Sintzenperg, Fridreich der Chersperger. Der brief ist gegeben, do von Christes gepu^erde waren ergangen Tausent iar, dreu hundert iar darnach in dem zwai vnd zwaintzkistem iar an sand florians tag.

Source Fulltext: OÖUB 5 (Wien 1868) S. 324-325, Nr. 334