Wir Wernher von Gotes gnaden Probst datz sand florians Haws veriehen vnd tun chunt an disem gegenwu^ertigen brief allen den, die in lesent oder ho^ernt lesen, die nu sind oder her nach chu^enftig werdent, daz sich vnser zehentner von Pirichorn Chunrat weilent Dietreichs sun mit seinen pru°dern vlreichen, Meinharten, Ortolfen vnd seiner swester Chu^enigunten mit vnserm willen vnd Rat vor vnser ga^entzleich verricht vnd verebent hat vmb daz recht, daz si mit sampt iem gehabtt habent an dem vorgenanten Hof datz Pirichorn also beschaidenleichen, daz er in viertzik phunt wienner phenning geben hat vnd seu der schon verricht hat, daz si gestanden sind gutleichen vnd willichen von allem dem Recht, daz si gehabtt habent zu dem Hof her von ierm vater mit soleichem gelu^eb, ob Chu°nrat der vorgenant vnd sein Hausfraw fraw katrei, di er heut hat, oder ein andreu, die er na^em nach ier tod, an Erben verschaiden, so schol der vorgenant Hof hinwider an seu recht als e geuallen. gewinnent aber si chind mit einander, die schu^ellen recht zu dem Hof haben vnd aller derselben Erben nach in. Ist aber daz, daz Chunrat der vorgenant sein Recht verchauffen wil, so schol er ez sein Pru°der an pieten vnd nach vier beschaiden mann Rat, di dar vber genomen schu^ellen werden, ze chauffen geben, wer aber, daz sein pru°der nach der rat nich chauffen wolten, so schol er sein recht geben vnuerzigen vnsers Rechtes, wem er wil. Stirbet aber er vor seiner Hausfrawen der oder einer andern, so schol sein hausfraw den Hof inne haben vntzt an iren tod. wil aber si verchauffen nach iers wiertes tode, daz schol si tun nur gegen iers wiertes pru°dern den vorgenanten vnd auch vmb viertzikch phunt wienner phenning, die dann gib vnd gab sind. Wier offen auch daz vnd wellen, swaz wandlung dar an, als hie geschriben ist, fu^erbaz erge, daz schol alles vor unser geschehen vnd mit vnserm wissen vnd ga^entzleich an schaden vnsers rechts. Vnd daz die Wandlung sta^et vnd vnuerchert beleib, darvber geben wier disen brief ze einem sichtigen vrchu^end versigelt vnd bewart mit vnserm insigel mit den zeugen, di hie geschriben sind: her Meinhart von Sintzenperg, Marichart von Chersperch, dietreich wolfstain, Heinrich hierttel, fridreich, hainreich swainpekchen, hainreich Chalnberger, Mertein der Stetner, Vlreich der Zehentner von Pirchorn vnd ander piderb lau^et vil, den ez chunt vnd gewizzen ist. Der brief ist geben v^eber Christi gepu^erd vber dreutzehen hundert iar, darnach in dem dreu vnd tzwaintzkistem iar an sand Bartholomeus tag.

Source Fulltext: OÖUB 5 (Wien 1868) S. 369-370, Nr. 374