Nos Fridericus dei gracia Saltzburgensis Ecclesie Archiepiscopus, apostolice sedis legatus confitemur et constare cupimus presencium inspectoribus vniuersis, Quod considerantes infrascriptam permutationem nobis et ecclesie nostre multipliciter fructuosam premisso diligenti tractatu cum dilectis in christo Chunrado preposito, Vlrico decano et capitulo ecclesie nostre de communi consensu et ynanimi voluntate eorum pro nobis nostrisque successoribus vice et nomine ipsius Ecclesie nostre dedimus et tradidimus causa permutationis venerabili viro Wernhero preposito Monasterij domus sancti Floriani Ordinis sancti Augustini Patauiensis dyocesis recipienti pro se suisque successoribus predium dictum Vorichen situm iuxta lacum Aeberse ad habendum, tenendum, possidendum et quidquid sibi deinceps de hoc placuerit, faciendum cum omni iure et actione, vsu seu requisicione Ecclesie nostre ex eodem predio aut ipsi predio modo aliquo pertinente. Idemque prepositus vice et nomine suo et Monasterii sui dedit et tradidit nobis recipientibus vice et nomine Ecclesie nostre predium dictum in Au^eg situm iuxta castrum nostrum hu^etenstain simili per omnia modo salua tamen nobis nostrisque successoribus remanente iurisdiccione in dicto predio Vorchen, quod in nostro territorio dinoscitur esse situm nec non proprietate, quam obtinemus in colonis illius. Dedimus eciam prefato preposito licenciam omnimodam recipiendi propria auctoritate possessionem eiusdem predii et promisimus vice et nomine, quo supra, ipsum predium sibi suisque successoribus ab omni homine legitime defendere, auctorizare et expedire, sicut et ipse promisit nobis de predio, quod nobis assignauit in cambium viceuersa. In quorum omnium testimonium et certitudinem pleniorem presentes mandauimus fieri litteras nostri et Capituli nostri sigillorum appensione munitas. Datum Saltzburge III. kalendas Augusti Anno domini M. CCC. xxiii.

Source Fulltext: OÖUB 5 (Wien 1868) S. 368-369, Nr. 373