Ich Pernhart der Jesnitzer genant vergich an disem brief offenbar vnd tu°n chunt allen den die disen brief sehent oder ho^ernt lesen, di nu lebent oder hernach chunftich sind, daz ich wol bedacht vnd mit gutem willen meiner Husvrowen vron Gerdrut vnd mit gutem willen aller meiner Erben ein gut der Piberhof genant in dem Geriht der Riedmarich vnd in der Pfarr zdem Neunmarcht gelegen mit allem dem Reht vnd dar zu° gehort ze holtz vnd ze veld besu°ht vnd vnbesu°ht gestift vnd vngestift han gesatzt vnd geantwurt dem erbern Ritter hern Chu°nraten von Humbrehtesried vnd allen seinen Erben vmb fumftzich phunt phenning alter wienner, der er mich gaentzleich vnd gar hat verriht vnd gewert, also mit beschaidenhait, daz ich (oder) mein Erben den vor geschriben Hof schullen lo^esen an sand Johans tach zden naehsten Sunnbenden, di nu chumftich sind, vmb di vor geschriben funftzich phunt alter wienner, lo^esen wir aber niht den selben Hof an dem vor geschriben tach ich oder mein Erben, wi daz chumt, so ist der selb Hof mit allem dem Reht vnd dar zu^e geho^ert veruallen ze rehtem aigen dem vorgenanten hern Chunraten von Humbretsried vnd allen seinen Erben oder wem er den selben Hof schaft oder gibt. Ich verpind mich auch dar zu° mit samt meiner Housvrowen vnd aller vnser Erben vnd auch Albreht von Vidorf mein Steufsun vnd Ru^eger der Wolfstain, daz wir des vor geschriben Hofs ir Gwer vnd ir scherm schullen vnd wellen sein an aller stat nach landes reht. Geschaech aber in dar vber dehain schad mit chrieg oder mit ansprach von vnsern Erben, den si gesagen mohten pei irn trewen, den selben schaden schullen wir in wider chern gaentzleich vnd ab legen an alle widerred vnd schullen si daz haben auf aller vnser hab, wo deu gelegen ist. Vnd wer da Rihter ist, da vnser Hab ist gelegen, der selb Rihter schol in Phand von vns antwu^erten vu^er allen irn schaden an allez reht vnd an alle chlag vnd geben vnsern guten willen dar zu°, versaument aber si di selben Rihter dar an, so schol der vor genant her Chunrat vnd sein Erben, oder wem er denselben Hof hat geschaft oder gegeben, vns phenden an aller stat, wo si vnser Gu°t an cho^ement, als lang vnd als vil, daz si ir schaden von vns gantz vnd gar zu° cho^ement vnd geben in dar vber disen brief ze einem sihtigen vrchu^ende mit meinem Insigel vnd mit Albrehts von Vidorf vnd mit Ru^egers des Wolfstain an Hangunden Insigeln wol bestaetet vnd geuestent vnd sind des Gezeug her Ott von Lonsdorf, Perchtold von Humbrehsried, her Hainreich der Stainpekch, Wernhart der Stainpekch, Ditreich Penesch vnd Buzzk sein Pru^eder, Vlreich der waltpot, Vtz der Schaffer vnd ander erber leut noch mer, den deu vorgeschriben sache ist chunt vnd wol gewizzen. Der brief ist gegeben, do von vnsers Herren Gepu^erd sint gewesen dreuzehenhundert Jar dar nach in dem dreu vnd zwaintzkistem Jar an Sanct Vlreichs tach.

Source Fulltext: OÖUB 5 (Wien 1868) S. 363-364, Nr. 369