Decet rerum et negociorum contractus, qui in presenciarum rite geruntur, Literarum et testium robore tanto caucius confirmari, quanto preter hoc tractatus diversi post lapsum temporis forcius inpugnabuntur in posterum sev obliuionis faucibus absorbentur. Proinde nos Wernherus miseracione diuina prepositus, Nycolaus decanus Totusque domus sancti floriani Conuentus Notum facimus vniuersis presentem paginam inspecturis, quod de gracia nobis per Reuerendum patrem et dominum nostrum karissimum dominum Albertum Patauiensem Episcopum et venerabile ipsius Capitulum de nouo facta quatuordecim librarum videlicet super Ecclesia sancte Marie in Waltchirchen, cuius juspatronatus ad nos dinoscitur pertinere, in qua etiam antiquitus ex donacione et concessione quondam domini Reynmari recordacionis felicis Patauiensis Episcopi per vnum ex Confratribus nostris ipsum inofficiandi plenum ius habuimus et regendi, licet postea per abusionem eidem iuri nos fecerimus alienos, de consilio Alberti tunc ibidem plebani vnanimi consensu statuimus a nobis et successoribus nostris omnibus inuiolabiliter perpetuo annis singulis obseruari, vt videlicet Prelatus summam predictam de manibus Plebani in Waltchirchen percipiat et procuret et ordinet singula et quelibet infra scripta per se eciam recipiendo iuxta consuetudinem in omnibus congruam porcionem. Primo igitur omnium in Resurreccione gloriosissime virginis Marie summum festum haberi volumus et ob hoc decem solidos denariorum diuidi inter fratres. Item festum sancti Stanijzlai martiris christi ad duas libras denariorum cum Cantu proprio sollempnissime et in translacione ipsius in cantu communi ad plenum Officium statuimus celebrari. Item singulis Minucionibus consuetis quatuor dierum quolibet persone cuilibet vnam denariatam panis Simulaginis Panem quippe non denarios instituimus ministrari, quam consolacionem Minualem et ad Subdyaconos et Conuersos et Sorores Clericosque seculares, si qui fuerint Prebendati, et non ad alios integre venire volumus et extendi Decano et Celerariis duplicem in hoc consolacionem percipientibus et Prebendam. Item in anniuersariis Alberti predicti Confratris nostri vnam libram et Hermanni de Pho^elnchouen quondam vicarii sui Sex solidos ad habendam plenam Missam et vigilias instituimus pro animarum ipsorum remediis exhiberi. Item in anniuersariis beatissime recordacionis dominorum quondam prepositorum Ainwici et succedentis sibi Hainrici die quolibet vnum ferculum de Piscibus ad sexaginta denarios Pisces quippe non denarios constituimus ministrari. Item Custodi sex solidos ad lumen in Nouo Refectorio peragendum (sic). Et vt plebanus in Waltchirchen, qui pro tempore fuerit, predictam summam denariorum singulis annis, vt tenetur, porrigat non inuitus, duobus Calceis filtratis ad sexaginta denarios annis singulis vestiatur, Quidque vero super predieta et instituta de summa quatuordecim librarum superhabundauerit, ad alios et Communes vsus Prelati debitum habeat et respectum. Ne igitur nostra presens ordinacio vmquam in posterum mutacionem vel diminucionem sev ablacionem in parte senciat vel recipiat sev in toto, statuimus, vt quando ad hoc deuenerit Plebanus in waltchirchen, qui pro tempore fuerit, predictam summam tamdiu per se teneat occupatam, quousque negligenciam, si qua fuerit, videat et inuenerit esse plenariter emendatam, facta autem emendacione Plebanus predictus sine contradicione qualibet integre debet in hoc persoluere et reddere, quod tenetur. Quod si forsan propter aliquam interrupcionem, quod absit, ob hoc factam se difficilem redderet ad soluendum, domini nostri Reuerendi Patauiensis Episcopi, qui tunc fuerit et Venerabilis eius Capituli tenebimur super hoc auxilium inuocare, vt ad faciendum, quod in hoc iustum est, censura Ecclesiastica strictius compellatur. In cuius rei testimonium presentes scriptas literas Munimine nostrorum roborauimus Sigillorum. Datum in Ecclesia nostra predicta anno domini Millesimo CCCmo. XXV°. die sancte Chvnigundis virginis.

Source Fulltext: OÖUB 5 (Wien 1868) S. 419-420, Nr. 421