Wier Wernher von Gotes Gnaden Probst vnd Nyclo Techent vnd all di sampnung datz sand Florians Haws verichen vnd tu°n chunt allen den, die disen brief sehent oder ho^erent lesen, die nu sind oder hernach chu^enftig werdent, daz der Erber vnd der piderb man vnser gu^et freunt her Ott weilent herren Reichers Sun von Perchaim gegeben hat vnserm Gotshaus ein Gu^et, daz gelegen ist ze Rafoltsteten, daz ein halbs phunt gelts ist, also beschaidenleichen, daz wir ewichleichen, die weil er lebet, seins vater jartag begen schu^ellen mit Vigili vnd mit selmessen, als bey vns gewo^enleich ist. Swann aber der vorgenant her Ott stirbet, so scho^el daz selgera^et vollen auf seinen jartag vnd schulle wier dann iem vnd seiner hausfrawen vnd allen seinen vodern vnd auch nachchomen an dem selben tag vigili vnd selmess singen, als vor geschriben ist, vnd schol man daz vorgenant halbs phunt phenning vnder vns tailen an dem selben tag ze oblay. Wier veriehen auch, ob wir immer an dein vorgenantem selgera^et, als vor geschriben ist, an sachh loz vnd saumig wa^ern, des ob got wil nicht geschehen schol, so schol sich der vorgenant her Ott oder nach iem seiner erben ainer der nagst dez gu^etz mit gut\eleichem vnserm willen vuderwinden vnd so lang inne haben, vntzt daz die saumung von vns vo^ellichleichen gepezzert werd. Wa^er aber, daz der, der sich des gu^ets darvmb vuderwunten het, nach der pezzerung nicht ledig wolt lazzen, so schol in vnser Vogt dez erno^etten, daz er davon cher vnd daz gu^et ledig lazze, vnd daz die red vnd daz gelu^eb sta^et vnd vnuerchert beleib, darvber geb wier disen brief ze einem sichtigen v^erchund versigilt vnd bewa^ert mit vnsern zwain jnsigeln. Der brief ist geben in dem vorgenanten vnserm Gotshaws nach Christi gepu^erde vber dreutzehen hundert iar, darnach in dem fu^emf vnd zwaintzkistem jar an sand Gregorij tag.

Source Fulltext: OÖUB 5 (Wien 1868) S. 425, Nr. 426