Nos Wernherus miseracione divina Prepositus, Nycolaus Decanus totusque Conuentus Monasterii sancti Floriani Canonicorum Regularium recognoscimus publice et fatemur, quod licet priuilegia, que nostra Ecclesia obtinet et habet a pluribus pontificibus Venerabilibus Patauiensis Ecclesie ac etiam ab aliis cuiuscumque condicionis existant, contineant et in ipsis nominentur alique possessiones et bona, que nunc venerabilis in christo pater et dominus dominus Albertus Ecclesie Patauiensis Episcopus nomine Ecclesie sue predicte tenet et possidet pacifice et quiete, que olim tenere et possidere debuit vel possedit Ecclesia nostra sancti Floriani supradicta, que per viam permutationis vel alias quemcunque modum a nostris predecessoribus fore dinoscuntur ac causis racionabilibus alienata, tamen eisdem possessionibus et bonis, quibuscumque nominibus censeantur, que nunc in presentiarum tenet et possidet Patauiensis Ecclesia et dictus dominus noster Episcopus nomine eiusdem, renunciamus expressius per presentes cedentes et renunciantes omni accioni seu iuri, si quid nobis vel Monasterio nostro, quod penitus diffitemur, competeret in premissis. Presertim cum a Patauiensi Ecclesia et ab eius Pontificibus, qui pro tempore fuerint, tamquam a fundatoribus nostris nos et Ecclesiam nostram plura recognoscamus beneficia recepisse. Huius itaque renuntiacionis seu protestationis nostre presentis literas reuerendus in christo pater et dominus noster Episcopus Patauiensis predictus a nobis habere voluit viceuersa, cum ab ipso nostrorum confirmacionem Priuilegiorum et jurium peteremus, quam de sua nobis paternitate venerabilis Capituli sui accedente consensu gratiose concessit.||
In cuius rei testimonium et certitudinem pleniorem presentibus Sigilla nostra duximus appendenda. Datum in sancto Floriano anno domini Millesimo CCC mo xx quinto Idus Septembris.

Source Fulltext: OÖUB 5 (Wien 1868) S. 437, Nr. 438