Ich Du^erinch der Piber vergich offenleich vnd tun chunt mit disem gegenwu^ertigen brief allen den, die in sehent oder ho^ernt lesen, die nu sind oder hernach chunftig werdent, daz ich mit wol verdachtem mu^et, wol gesunt vnd witzzig, zu der zeit, do ich ez wol getu^en mocht, mit meiner hausfrawen vrawen diemu^eten vnd auch aller meiner erben guten willen auf daz wierdig vnd Ersam Gotshaus ze sand Florian geschaft vnd gegeben han Hundert phunt phenning wienner mu^enzz, der selben phenning schol daz selb Gotshaus vnd die herren do selbe gewarten vnd entphahen an der ersten werung, so mein herren die Edeln fu^ersten von Osterreich von mier oder von meinen Erben ledigent vnd lo^esent sechtzig phunt phenning, die si mier vnd meinen erben geschaft habent auf der Mautt datz Lintz ia^erleich ze nemen an abschlag, da ich in vmb gelihen han sechs hundert phunt phenning, vnd han die prief, die mier von den Fu^ersten darv^eber gegeben sind ze vrchund auch geantwu°rt hintz dem vorgenanten Gotshaus. Gestet aber, daz bey mier lebentigen von mier nicht gelo^est wiert, so schullen die vorgenanten herren alle di weil der satz stet, alle iar der vorgenanten sechtzig phunt phenning zehen phunt selben entphahen vnd nemen zu dem ersten, so man si raichet vnd antwu^ertt von der Mautt mit meiner erben gut°leichen willen an abschlag der vorgenanten Hundert phunt, vnd swaz der phenning wiert vor der Losung, di schol man zu den hundert phunten legen vnd schol da von mier vnd meinen erben vnd allen meinen vodern und nachchomen ein ewiges selgera^et datz dem vorgenantem Gotshaws nach meiner na^echsten freunt Rat gesatzt vnd gestift werden. Vnd daz die red vnd daz gescha^eft sta^et (sic) vnd den herren daselben disen brief ze einem sichtigen v°rchu°nd versigilt vnd bewart mit meinem jnsigel vnd ze pezzer sta^etigung vnd zeug mit herren Eberhartz von walsse Lantrichter ob der Ens Insigel, mit andern zeugen, di hie genant sint: her Chunrat von Harthaim, her Ott von Perchaim, Dietmar von Aistershaim, Perchtolt von Harthaim, Herbort von Chremstorf, Dietmar Wolfstain, Fridreich vnd Hainreich Swainpekchen, Hainreich Hierttel vnd ander piderb lau^et, den ez chunt vnd gewizzen ist. Der brief ist geben in dem vorgenanten Gotzhaus datz sand Florian, do von Christes gepu^erd vergangen waren Dreutzehen hundert iar, darnach in dem fu^enf vnd zwaintzkistem iar an sand Merteinstag.

Source Fulltext: OÖUB 5 (Wien 1868) S. 439-440, Nr. 440