Ich Hainrich von Alharting, hern Rudolfs Sun vnd ich Elsbeth sein housfrowe veriehen vnd offen an disem brief, daz wir vnser halben Mul, di wir haben gehabt datz Lorich, gesetzet haben ze rehtem pfande den Ersamen herren hern wernhern ze den ziten Probst vnd der Samnung des Gotshous ze Sant Florian zv dem andern halben tail der selben Mul, daz in vor Manigen iaren von vnsern veodern ze Selgereth gegeben ist, vnsern vorgenanten tail der Mul vmb sehtzik pfunt wienner pfenninge, der wir gentzlich gewert sein, vnd haben in di gesetzet mit aller stet, als satzes reht ist in dem Land ze Osterrich vnd ob der Ens. vnd sein des selben satzes, ir Gewern vnd scherm fur alle ansprach vnd also, daz si di selben halben Mul inne haben suln ze rehtem pfande mit allen nutzen, alle di weil vnd wir oder vnser erben di vorgenanten sehtzik pfunt in, daz ist den vorgenanten herren, niht gegeben habent, wir wellen ouch vnd loben, ob die vorgenanten herren vnd daz Gotshous des satzes vber reht, des satzes vber reht (sic) iht geniezzen oder genemen mohten, daz daz selb guet vnser vnd vnserrre veodern selgereth sol sein also, daz in an der leosung dehain abslach geschehen sol — Daz dise sache vnd dise gelubde vber disen Satz von vns vnd von vnsern Erben, als vor beschaiden ist, stet vnd vnuerchert beleib, daruber gebn wir disen brief den oft vorgenanten herren ze vrchund bestetigt mit mein Hainreichs jnsigil vnd mit hern Eberharts jnsigil von walsse ir vogts vnd Lantrihter ob der Ens, der brief ist gegebn nach gots gepurt vber drwtzeh hundert iar, darnach in dem fumf vnd zwaintzkisten iar, an sant veijts tak.

Source Fulltext: OÖUB 5 (Wien 1868) S. 428, Nr. 429