Ich Hainreich vnd Seybot paid pru^eder von Volchenstorf veriechen vnuerschaidenleichen vnd tvn chvnt mit vrchu^end des priefs allen den, die in sehent oder ho^erent lesen, di nu sint oder hernach chv^enftich werdent, Daz der Erbêr vnser Ritter vnd triwe Dienêr her Meinhart von Sintzenperg zv vns chom vnd sein paid su^en Ott vnd Alram vnd paten vns durch Got vnd durch irer dienst willen, daz wir die aigenschaft auf dem Guetlein, daz da haizzet in dem Stochêch vnd ir recht Lehen von vns was vnd leit in Hegdige\arsperg pfarr vnd ist Sechtzig pfenning gelts, auf geben dem Erbêrn Gotshaus vnd der Samnung hintz sand Florian, do wolden si ir recht auch geben dem selben Gotshaus zv ainem ewigen Selgerêt. Do gedacht wir, daz vnser Vodern aller gu^eten dinge volfu^ere\ar stêt sint gewesen vnd wolden den selben gern nach volge\ar sein vnd bedachten vns mit gemainem Rat vnd mit gu^etem willen aller vnser Erben vnd gaben vnser Aygenschaft, die wir heten an dem vorgeschriben Guetlein, dem ee genanten Gotshaus vnd der Samnung ledichleich vnd vreileich mit allem nutz, allen irn vrum damit ze schaffen, vnd der ee genant her Meinhart vnd sein paid Su^en Ott vnd Alram gaben ir recht mit sampt vns auf daz ee geschriben Gotshaus vnd der Samnung mit allem dem nutz, den si dar an gehabt habent, versu^echt vnd vnuersu^echt an alles gevêr vnd an allen Chrieg, als si selben bestêtent an dem prief mit ir jnsigel. Vnd loben auch daz, daz wir des vorgeschriben Guetlein des oft genanten Gotshaus vnd der Samnung recht gewern schu^ellen sein fu^er all Ansprach nach Landes recht. Daz dise sach stêt vnd vnuerchert beleib, dar vber geben wir disen prief ze ainem vrchv^ende versigelt mit vnsern paiden anhangentn Insigeln. Der sach sint zevg her Chvnrat von Harthaim, her Ott von Perchaim, Dietmar von Aystershaim, Perchtolt von Harthaim, Herbort der Chremsto^erfer, Ru^edger der Wolfstain, Dietmar der Wolfstain, Ru^edger der Holtze\ar vnd ander piderber leut genueg. Der prief ist geben datz sant Florian, do von Christes gepu^ertt ergangen warn Dreutzehenhvndert jar, dar nach in dem siben vnd zwaintzikisten jar an sant Agnesen tag.

Source Fulltext: OÖUB 5 (Wien 1868) S. 464-465, Nr. 468