Nos Wernherus permissione diuina Prepositus, Nycolaus decanus totusque domus sancti Floriani Conuentus notum facimus vnuersis presentes litteras inspecturis, quod honestus et discretus vir dominus Meinhardus Miles de Sintzenperg plebesanus noster volens apud nos anime sue Remedium facere salutare, Pratum quoddam iuxta villam nostram, quod a nobis in pheodo tenuit, et hortum ibidem de prope ad redditus insimul decem solidorum ad nostre donauit Officium Custodie, vt videlicet ante altare in ambone Monasterii nostri positum de die et in angulo Circuitus siue Ambitus nostri iuxta sanctam Katherinam de nocte duo lumina perpetuo habeantur. Alberto quoque dicto wolfstain Confratri nostro tunc temporis Rectori hospitalis nostri decem libras paratorum denariorum wiennensium assignauit, pro quibus et pluribus, quos alias ad summam Quadraginta talentorum idem Albertus habuit, vineam vnam in wachave iuxta weizzenchirchen sitam et smolatsch dictam eidem hospitali adherendam perpetuo conparauit, de cuius prouentibus eidem Meinhardo in Remedium debetur annis singulis vna libra. Item prediolum in Stokchêch iuxta Hedgersperg soluens sexaginta denarios annuatim hospitali predicto idem Meinhardus donauit et fecit libere deseruire, vt videlicet de eisdem sexaginta denariis et vna libra de vinea proueniente predicta decem solidos insimul facientibus cum dimidia libra ad Oblagium data anniuersarius suus cum vigiliis et Missa perpetuo annis singulis peragatur et cum VI solidis residuis in Capella sancte katherine Tumbe sue vicina vnam Missam defunctorum in Remedium anime sue singulis secundis feriis predictus hospitalarius celebrari procuret. In qua quidem feria, si propter festorum sanctorum occupacionem quandoque vel causam aliam legitimam conmode fieri non possit, die seguenti vel alia in eadem duntaxat ebdomada suppleatur. Ad quelibet igitur predicta perpetuo fideliter peragenda nos et successores nostros tam strictius obligamus, vt si negligencia in posterum reperiatur, quod absit, forsitan in predictis causa legitima non obstante, senior heredum Meinhardi predicti monicionibus premissis se de bonis prehabitis intromittat et tam diu teneat occupata, quo vsque neglecta sufficiencius corrigantur, facta autem emendacione idem cum bonis predictis amplius disponere nil habebit. In cuius rei testimonium presentes litteras conscriptas nostrorum roborauimus munimine sigillorum. Datum in Ecclesia nostra predicta Anno domini M°. CCC°. vicesimo Octauo Georii Martiris christi.

Source Fulltext: OÖUB 5 (Wien 1868) S. 513-514, Nr. 512