Ad cunctorum noticiam perueniat in hiis scriptis, quod cum nos Wernherus domus sancti floriani prepositus Capellas siue Ecclesias in bonis nostris sitas sanctorum Stephani in Rorbach, Laurencii in Chvrtzenchirchen omni obsequio humano, quod ad reuerenciam deo et sanctis eius alibi fieri consveuit, videlicet in luminibus et aliis carere penitus videremus, bono moti zelo predium quoddam in Gruennprunn, quod Engelpertus dictus hyrtel a nobis et Monasterio nostro in pheodo tenuit, soluens annis singulis vnam libram pro quindecim talentis denariorum wiennensium comparauimus ab eodem de nostrorum dominorum siue fratrum Nycolai decani et Conuentus tocius permissione ac consensu vnanimi statuentes, vt prepositus, qui pro tempore fuerit, iam dictum predium manuteneat et gubernet, seruicium sev prouentus eiusdem ad alluminandas predictas Ecclesias annuatim diuisos equaliter amministret Negligentemque sanctorum predictorum vindex indignacio et hic et in futuro tenebras faciat possidere. Ne igitur successorum nostrorum quisquam redditus iam dictos ad vsvs alios in posterum conuertere debeat vel presumat, presentes litteras in testimonium scriptas nostrorum robore communiuimus sigillorum. Datum in Monasterio nostro anno domini M°. CCO°. XXVIII°. Floriani Martiris christi et patroni nostri.

Source Fulltext: OÖUB 5 (Wien 1868) S. 515-516, Nr. 514