Wir Johans vnd Liutolt von Chunring, Obriste Schenken in O^esterich wir chunden Offenbar an disem brief allen Leuten, Daz vns gepotn ist vnd auch ernstlich beuolichen von vnserm gnedigen herren dem Ro^emischen Chunig Fridreichen vm die Ersam geistlichen herren von sand ypoliten vnd von Sand Florian vm ier Cehent, den siw habent in allem Tal in der Wachowe, der in ze recht geuellet, des siw gu^et brief vnd v^erchunde habent vnd dar u^eber Mainchualtichleich an dem vo^ergenanten Cehent werdent geyerret, daz wier Johans vnd Liutolt von Chunring an gesehen haben durich got vnd durich des rechten willen vnd von vnsers vo^ergenanten herren des fu^ersten gepot wellen wir vnd gebietten auch vestlichen pei vnsern hulden allen vnsern Amptleuten, die wier haben in der wachowe vnd auch gewinnen, daz siw Niemand ouz dem Tal, er sey gast oder Pu^erger, geistlieh oder weltlich dhainen wein lazzen fueren, er wert denne emalen den vorgenanten geistlichen herren scho^en vnd gantz ver Cehent vnd des selben man haben sol ier gu^et warzaichen. Wer aber daz nicht hat vnd vnsers herren des fu^ersten gepot dar an vber vert, der wizze sich veruallen sein alles des weins, des er hat in dem Tal ze wachowe vnd auch seiner hab, daz er dar an geyerret wiert, vntz er die Egenanten herren yeres Cehents gantzlichen berichtet oder er beweis siw mit waz rechten er sein welle vber habt werden. Vnd dar uber, daz ditz gepot vnsers herren des fu^ersten stet beleybe dar um geb wier ich Johans vnd ich Liutolt von Ku°nring disen brief zu^e aim v^erchunde versigelt mit vnsern Insigeln — Nach christi gepurd drewtzehen Hundert iar in dem Newnten vnd zwainziksten iar des Mitichens an sand Cosme vnd Damiani tag.

Source Fulltext: OÖUB 5 (Wien 1868) S. 553-554, Nr. 554