Wier Fridreich von Gotes gnaden Ertzbischofvon Saltzburch, Legat des stuels ze Rom vergehen offenleich an disem prief vnd tu^en chu^ent allen den, di in sehent oder horent lesen. Darnach vnd wier dem brobst vnd dem gotshaws von sand Florians haws heten geben vnd geantwu^ertt di swaig vnd daz gut datz vorichen auf dem aberse vnd derselbe probst vnd sein sammung vns vnd vnserm gotshause herwider het gegeben vnd geantwu^ertt zu widerwechsel di swaig in der awe pei hu^etenstein, da wurden di lau^et, di gesezzen waren auf dem gu^et ze vorichen vnd di lau^et, di da sazzen auf vnserm hof ze stokcha, ze chrieg vmb den gesu^ech, den si scho^elten haben an der alben, di do haizzet wiselperch. derselb chrieg wart zwischen vns vnd dem egenanten probst vnd seinem Gotshaus datz sand Florians haws vertaidingt vnd liebleich berichtet also, daz di lau^et, di nu vnd auch furbaz sitzent auf dem guet vorihen vnd auch auf vnserm hof ze stokcha sullen ir viechwaid vnd ir gesu^ech haben an der egenanten alben ze wiselpereh, doch schu^ellen di lau^et ze vorichen vor auz geruebt vnd an chrieg haben daz wismad, daz si an der selben alben nu habent vnd vntz her habent gehabt. Wir haben auch den selben lau^eten ze vorihen abgenomen ewichleich lember vnd gericht habern, di auf dem guet ze vorihen e sint gelegen, di weil ez in vnserr gewalt dannoch waz, dez schullen diselben lau^et furbaz ledig sein. Darvber geben wir disen prief versigelt mit vnserm anhangundem Insigel, der ist geben ze Saltzburch dez Sampztags nach sand Michelstag, da von Christes gepurd waren drevzehen hundert jar darnach in dem nevn vnd zwaintzkisten iar.

Source Fulltext: OÖUB 5 (Wien 1868) S. 554-555, Nr. 555