ICH Janns vonn Capelle, Chunigundt sein hausfrau, vllrich vnnd Eberhartt vnnser Sün vnd all vnser Erbenn veriechen vnnd thuen offentlich khundt allen den die disen brieff Sechent oder hörent lesen, die nun Sündt vnnd hernach khunfftig werdten, das wier gegeben haben viertzig Pfundt Gellts vnnsers Erbs dem Gottshauss zu Pulgarn ordten des heilligenn Geists mit allem dem Recht, alss wier es jnnegehabt haben, dauon man haben soll acht frauen desselben ordens also, wann aine abstyrbt, das man ain anndere ann jer Statt soll nembenn von dem guett, das hernach geschriben ist: die khlainen maut zu Lintz auf der Thainaw füer zechen Pfundt Gellt, den hoff zu Bempach Sybent zechen schilling vnnd zwaintzig Pfening gellts, daselbst den zechennt ainvnndzwaintzig schilling vnnd fünfftzechen Pfening Gellts, den hoff zu Egelsee dreu Pfundt drey schilling Pfening vnnd Sechtzeehen Pfening gellts, den hoff zu Reuth Sybenzechen schilling vnnd zwenn vnnd dreyssig Pfenning Gelts, daselbst ein Lechen Sechs schilling gellts, den hoff zu Khutzenberg dreytzechen schilling vnnd zwaintzig Pfening gellts, daselben der annderhoff dreytzechen schilling vnnd Sechs Pfening gelts, die hueb jnn dem Reutt bey dem Zeillach Sechs schilling vnnd drey Pfening Gellts, zu Khrembs auf unnser frauenberg vnnd zu Rechberg jnn dem Thall fünff Pfundt vnnd ain vnnd Sechtzig Pfening gellts, zu Gumpendorff Acht Pfundt vnnd ain vnnd dreyssig Pfening Gellts, zu Tanndorff ain hueb ain Pfundt Gellts an acht Pfening, die hueb auf dem heilligen Stain an zwen drey schilling Pfening gelts. das vorgenant Guett alles hab ich Jannss von Capelle, Khunigundt mein hausfrau, vllrich vnnd Eberhartt vnnser Sün Gegeben freilich vnnd Ebigkhlich den vorgenanndten frauen des ordens des heilligen Geists zu Pulgarn jnn die hanndt Brueder Symeons des obristen maisters zu Rom des ordenns des heilligen Geists mit allem dem Recht, alss mein vatter herr vllrich von Capell vnnd mein muetter frau margaretha, denen Gott genadt, gegeben habennt demselben orden zwayen Priestern vand zwelff düerfftigen, vnnd bin auch Ich der vorgemellt Janns von Capelln scherm vnnd gwer vnnd alle mein Erbenn, die vorgenant Sündt, desselben hauss zu Pulgarn füer alle Annsprach nach Lanndes Recht vnnd bin auch vogt desselben hauss, die weill ich leeb, darnach ist vogt, wer Steyreckh jnnhatt meiner Erbenn, wer aber, das Sy die vorgenanten Erben Steyreckh an wuerdten, von welcherlay (Sach ?) das khäm, das Sy Sein nicht Enhietten, so soll je der Eltest vogt Sein, der dann lebt, vnnd das die vorgenanndt Redt vnnd wandlung Stätt vnnd vnzerbrochen bleibe, so geben wier dem vorgenanndten Gottshauss disen brieff zu ainem wahren Gezeug vnnd offen vhrkhundt bestätt mit vnsern jnsigln vnd mit der Erbarn herrn jnnsigll herrn Alberts insigll von Chunring vnsers öheims, mit herrnn Eberharts jnsigll von wallsee Lanndtrichter ob der Enns, mit herrnn Jannsens jnnsigll von Khunring herrnn Leotols Sun von Khunring vnnd mit herrn Ottens jnnsigl von Zelkhing herrn Ottn Sun von Zelckhing. diser brieff ist geben, da von Cristus gebuert, erganngen warn 1332 Jahre an vnser frauen verkhündigung.

Source Fulltext: OÖUB 6 (Wien 1972) S. 59f., Nr. 50