Ich Hertweich heren Rvgers Svn von Hv^ett vergich offenleich vnd tuen chvnt mit disem gegenwurtigen brief alle den, die in sehent oder horent lesen, di nu sint oder her nach chvnftig werdent, daz ich mit gvten willen miner hovsvrowen vron Agnes vnd miner brvder Albers vnd Otten, mit willen meiner Chinde Otten, Johansen, Elspeten vnd Agnesen, di ich ze den ziten gehabt han, vnd mit ander meiner vrevnt vnd Erben rat zter zeit, do ichs wol getven mocht, gegeben vnd geschaft han hintz dem Erbern Chloster ze sand Florian mier vnd meiner hovsvrovn vnd allen meinn vodern vnd nachchomen ze einem ewigen Selgro^et Nevn schilling vnd drey pfenning gelts never wienner, di man mier ierleich an sand Michels tag gedient hat von Winthersdorf in dem forst, daz mein vreiz aigen gewesen ist, vnd dar avf von meinn brvedern getailt pin. Daz selb vorgenant gvet han ich dem Brobst vnd der Samnvng dez vorgenanten Gotshavs gegeben ledichlich vnd vreylich mit allen dem recht, vnd ich dar an gehabt han also, daz mein Erben ansprach dar ovf nimmer me gehaben svln mit solicher beschaidenhait, daz die herren datz dem vorgenantne Chloster meinen vnd meiner Havsvrown jartag alle iar begen schvllen mit vigilig vnd Selmess als gewondleich ist, vnd schol der amptman dez selm Chlosters, der daz vorgenant gvet besorigt, an dem selben jartag ain pfvnt pfenning vnder die herren tailen vnd die vbrigen pfenning fver sein mve behalten. Wer aver daz dar an chain Savmvng fvrwaz geschech an ehaft not, so schvllen mein Erben die vorgenanten herren dar vber mannen vnd wvert da nach die Savmvng nicht gepezzert, so schol mein nachst Erb sich des guets vnderwinden vnd als lang inne haben, vntz die Savmung gepezzert werd, vnd swann die pezzrvng geschiecht, so schol der selb mein Erb den vorgenanten herren daz selb guet wider ledich lazzen an alln Chrieg. Wolt aver er dez wider sein, so schol jn des vorgenanten Chlosters vogt dar zve bedwingen. Vnd daz die wandlvng vnd mein gescheft stêt vnd vnzebrochen beleib, dar vber gib ich disen brief versigelten vnd bewart mit meinem jnsigel vnd mit den zevgen, die hie genant sint, Her Hainreich, her Seybot brveder von volchensdorf, Her Chvnrat von Harthaim, Herr Ott von Perchaim, Dietmar von Aichtershaim, Herwort von Chremsdorf, Pylgreim von Ebelsperch vnd ander piderb levt genveg, den iz chvnt ist. Der Brief ist gegeben, do von Christ gepverd ergangen woren Drevzehen Hvndert jar, Dar nach in dem zwaimedreiskisten (sic) jar an sand Egyden tag.

Source Fulltext: OÖUB 6 (Wien 1972) S. 74f., Nr. 65