Ich Eberhart von Walsse, Lantrichter ob der Ens, vergich offenwar an disem Brief vnd tven chvnt alle den, di in sehent oder horent lesen, di nv sind vnd her nach chvnftig werdent, Daz fu^er mich chom vrowe Christein, Seifrids Tohter von Lantzenberg in di offen Schrann ze Wels vnd pat vrogen mit vorsprechen ein aygen, daz si chouft hiet vmb ir aygenhoft Guet von irem vorgenanten Vater, dez choufaygen iz ouch gewesen waz, ob si daz geben mo^eht, swem si wolt. Do ward ir ertailt von Dienstmann, von Rittern und von Chnehten, si mo^eht ir Choufaigen wol geben, swem si wolt, des ward ir zivg gegeben all di an der Schrann waren. Daz selb choufaygen, des ein halber Hof ist vnd haizzet an der wis bey Grvennprvnn hat si verchouft vnd mit gueter gewizzen gegeben mit alle dem, daz dar zve geho^ert, versueht vnd vnuersueht dem Ersamen Gotishous vnd der Samnvng datz sand Florianshous vmb ein halb herren pfrvent ze nu^ezzen alain vntz an iren tod vnd nach ir tod schol di selb pfrvent ledich sein dem ê genantem Gotshous an allen Chrieg vnd schol dann ir vnd aller ir Vodern selgret sein also, daz si aller der guten ding tailhehtig schol sein, di ewichleich in dem vorgenantem Goteshous geschehent von den Pruedern mit Missen vnd ander gueter werch. Mich hat ovch gebeten di egenant vrowe Christein dienstleich vnd sunderleich dvrch Got, daz ich des vorgenanten Gutes vnd irz selgeretz ir vnd des Gotshous scherm sei fuer allen gwalt vnd fuer vnreht ansprach, daz ich ir gelobt han, alz ich des andern Guets Scherm vnd Vogt pin von meiner herren wegen der Hertzogen in Osterreich. Der sach vnd der wandlung pin ich zivg mit disem gegenwurtigen Brief versigeltcn vnd bewart mit meinem anhangundem Insigel mit den zivgen, di hie geschriben stent, her Albrecht von Volchenstorf, her Hainreich vnd her Seybot Prveder von Volchenstorf, her Vlreich der fulich von Wels, her Vlreich von Tann, her Rueger der wolfstayn, her Marchart von Chersperg, her Marchart der Ponhalm, Jans von Tann, Dietmar der wolfstain, Hainreich Hyertel, Fridreich der welhinger vnd ander erber Levt genveg, den di sach vnd di wandlvng wol chvnt vnd gewizzen ist. Der Brief ist gegebn Nach Gotis puerd vber Drivzehen Hundert jar, dar nach in dem drev vnd dreizkistem jur datz Lintz in der Stat an vnser vrowen tag zder Chvnnvng.

Source Fulltext: OÖUB 6 (Wien 1972) S. 88f., Nr. 79