Wir Albrecht von Gotes gnaden Bischof tze Pazzowe vergehen offenlich mit disem brif vnd tun chunt allen den, di in sehent oder horent lesen, Daz Pilgreim. weylent vnser amptman datz Ebelzperch an seinen letzten zeiten, do er iz dannoch wol getu°n macht, durich seiner vnd auch seiner Hausfrowen vnd ir Chinder sel hayl recht vnd redlich geschaft vnd ze aigen ledichleich gegeben hat dem Gotshavs zder Pfarr datz Ebelzperch fumfthalb jeuch akchers, di da ligent in dem Purchvrid ze Ebelzperch in drin velden, di Albrecht der Gneuss des vorgenanten Pilgreims aydem yetzo inn hat, also beschaidenlich, daz der selb albrecht, oder wer den akcher inn hat, alle iar des vorgenanten Pilgreims jartach sol begen Vnd sol dem Pfarrer geben des abends von vigili tzwelif phenning Vnd des morgens sechzich phenning ze zwayn Messen ze opfer, dem Mesner zwen phenning vnd ain phunt wachss ze Chertzen, fumf schilling phenning vmb prot arm Laeuten vnd denselben arm Laeuten drey schilling phenning vmb vleisch. Taet aber des der vorgenant Albrecht nicht, oder wer di akcher inn hiet, vnd iz nicht begieng gentzleich vnd gar, als vor geschriben stet, So schol der Pfarrer ze Ebelzperch wer di zeit da ist, nach vier Purger Rat da selbs ze Ebelzperch vollen gwalt haben, di vorgenanten Aekcher lazzen einem anderm piderm mann, wem si wellent vnd in geuellet also, daz der vorgenant jartach vnd daz selgraet da von begangen vnd volfu^ert werd gentzleich in aller der mazz, als vorgeschriben stet. Dar vber ze vrchund geben wir disen brif versigelt mit vnserm anhangundem jnsigel, Der ist geben datz Ebelzperch Nach Christes gepu^erd Dreutzehen Hundert iar, in dem vier vnd dreizzkistem Jar.

Source Fulltext: OÖUB 6 (Wien 1972) S. 144f., Nr. 137