Ich Hagen von Spylwerch vergich vnd tuen chvnt an disem Brief alle den, di in sehent oder ho^ernt lesen, di nv lebnt oder her nach chvnftich werdent, daz ich (mit) verdahtem mvet vnd mit gvnst vnd guetem willen miner Housfrowen vron Margreten vnd miner svn Erharts vnd Peters vnd aller miner Erben verchouft han dem Erbern Gotshous datz sand Florian mein Hueb datz O^etzeinstorf, di da leit in sand Oswalts pfarr bey der Vreinstat vnd auf derselben Hueb zway tail zehents vnd in dem selben dorff datz O^etzeinstorf ouf drin Hueben zway tail zehents vnd von minen herren den Hertzogen ze O^esterreich lehen was, mit alle div vnd dar zue geho^ert ze holtz, ze veld vnd ze dorff, versueht vnd vnuersueht vmb svbentzk pl'unt pfenning alter wienner Mvnzz, der ich gantz vnd gar gewert pin. Ich lob ouch vnd all mein Erbn, daz wir der ê genanten Hueb datz O^etzeinstorf vnd der zehvnt reht gwer schullen vnd wellen sein an aller stat fu^er alle ansprach nach Lands reht in Osterreich, swo des dem êgenantem Gotshous abgieng an vns, des si dhainen schaden nemen oder mohten nemen, den schullen si haben ouf alle div vnd wir haben in dem Lande ze Osterreich. Daz der chouf vnd disiv wandlung staet vnd vnuerchert bleib von mir vnd von meinen erbn ewichleich, dar vber gib ich dem vorgenantem Gotshous vnd der Samnvng disen Brief ze einem waren vnd ewigem vrchvnd versigelten mit meinem anhangundem Insigel vnd durch pezzer sicherhait mit miner herren Insigel von walsse hern Eberharts vnd hern Reinprehts, in der Lantgeriht div genant hueb gelegen ist, Vnd mit den zivgen, di hie genant sind, her Vlreich von Grvennburch, her Dytreich wenisch von der vreinstat, her wenisch sein svn, her Fridreich Schovtolf, her Herman Hagen, v^etz der Schaffer zder Vreinstat, Peter der Milichtopf von Steyr vnd ander erber Livt genveg, den div sache vnd diser chouf wol chunt vnd gewizzen ist. Der Brief ist gegebn Nach Gotis puert vber drivzehen Hvndert iar, darnach in dem vier vnd dreyskistem iar an sand Benedicti tag.

Source Fulltext: OÖUB 6 (Wien 1972) S. 115f., Nr. 108