Ich Rudolf der wolueroeuter vergich an disem brief vnd tu^en chund alle den, die in ansehent oder horent lesen, Daz ich mit wol uerdachtem mu^ete vnd da ich iz wol getu^en mo^echte mit aller meiner erben gunst vnd gutlichem willen Meiner sele vnd aller meiner vodern sele ain Ebigen Jartag geschaffet vnd bestetigt han hintz der Pharre ze sand Michel in der wachowe ouf meim weingarten datz Mitterekk ze wesendorf, do von man dienet zwen phenning ze Pu^erchrecht in der Mu^errinne lehen. Man sol ouch den vo^ergenanten Jartag begeen alle iar an vnser frowen tag ze der Chu^endunge in der vasten mit Messe, mit Vigilii vnd sechtzik phenning ze Opher, zwai praet, an (sic pro ain) diech Rintfleichs vnd ain Emmer weins, Vnd daz ander sol man vnder arme leute Taylen. Ich offen ouch. wenne ich nicht pin, daz denne den vo^ergenanten Jartag begeen sol der nächst vnd der peste erbe vnder meinen vrewnten, den siw mit aim gemainen Ratt dar zu^e Nement. Wer aber, daz siw dar um Chriegen wolten vnd den Jartag da mit sowmen wolten, So sol der Pharrer ze den Zeiten datz sand Michel sich des Egnanten Weingarten vnderbinden vnd sol in so lange ynne haben vnd den Jartag do von begeen, vntz sich mein Erben des bedenchent, wem sew den Jartag beuelichen, Vnd dem selben sol der Pharrer den Egenanten Weingarten wider antwurten an allen Chrieg vnd an alle wider Rede. Daz ditz gescheft also steet Ebich vnd vntzeb*'ochen beleybe, dar um gib ich vo^ergenanter Rudolf disen brief versigelten mit meim Insigel vnd mit meins herren Insigel hern Jansen von Chunring zu aim geziuge Nach christes gebfirde drewtzehen Hundert iar in dem Vier vnd dreizziksten iar, des Vreitages nach vnser frowen tag zer Schidunge.

Source Fulltext: OÖUB 6 (Wien 1972) S. 136f., Nr. 128